गाउँमा घरेलु मदिरा नष्ट गर्न प्रहरी पुग्यो । दर्जनौँ घरमा छापा मार्यो । घरेलु मदिरा कतै भेटिएन । बिना लेबलको घरेलु मदिरा अवैध मानिएकाले नष्ट गर्न प्रहरी गएको थियो । गाउँभर छापा मार्दा नभेटिएपछि निराश भएर प्रहरी टोली कार्यालय फर्किन लागेका थिए ।
थकित प्रहरीलाई प्यासले सतायो । नजिकै रहेको एक कलधारा (ह्यान्ड पम्पमा)मा पानी खान केही प्रहरी गए । उनीहरूले पम्पको ह्यान्डल दबाएर पानी निकालेर खान थाले । तब थाहा भयो, रक्सी लुकाएको ठाउँ ।
कलधाराबाट आएको पानी थिएन, रक्सी थियो । फिल्मको कथा जस्तो लाग्ने यो घटना भारतको उत्तर प्रदेशको झाँसीस्थित एउटा गाउँको हो ।
भारतीय सञ्चारमाध्यमका अनुसार अवैध मदिरा बिक्री वितरणको सूचना पाएको प्रहरी टोली अनुसन्धानका लागि गाउँमा खटिएको थियो । कलधाराबाट रक्सी निस्किएपछि केहीबेर प्रहरी नै चकित परेको थियो ।
‘कलधारा’ गाडिएको ठाउँमा उत्खनन् गर्दा प्रहरीले अवैध मदिराका ड्रम फेला पर्यो । जसलाई ‘कल धारा’मा जोडेर मदिरा निकाल्ने गरिएको थियो । प्रहरीले उक्त स्थानबाट ६ सय लिटर अवैध मदिरा बरामद गरेको छ ।
भारतीय सञ्चारमाध्यमका अनुसार अनुसन्धानमा खटिएको प्रहरी टोलीले स्थानीय दुई महिलालाई पक्राउ गरेको छ ।
Facebook Comment
Comment