राष्ट्रिय टी–२० क्रिकेटको उद्घाटन खेलमा मधेसले बागमतीलाई हरायो

नेपालभ्युज

काठमाडौं। राष्ट्रिय टी–२० क्रिकेट प्रतियोगितामा मधेस प्रदेशले बागमती प्रदेशलाई हराएको छ।

मूलपानी क्रिकेट मैदानमा मंगलबार भएको उद्घाटन खेलमा मधेसले बागमतीलाई ६ विकेटले पराजित गरेको हो।

बागमतीले दिएको १४२ रनको लक्ष्य मधेसले १७ ओभरमा ४ विकेटको क्षतिमा पूरा गर्यो। मधेसको जितमा साहिल पटेलले अर्धशतकीय पारी खेले। उनले ४९ बलमा ४ चौका र ४ छक्का प्रहार गर्दै ६७ रन बनाए। मयन यादवले २३ रन बनाउँदा रोहन बिकले भने ३२ रन बनाए।

बागमतीका लागि सुवास खत्री, गौतम केसी र सोनु देवकोटाले १–१ विकेट लिए।

पहिले ब्याटिङ गरेको बागमतीका लागि शुभ कंसाकारले ४३ र आशुतोष घिरैयाले ३७ रन बनाए। मधेसका लागि रुपेश सिंह, विशाल पटेल, अभिषेक तिवारीले २–२ तथा रञ्जित कुमार र प्रदिप पास्वानले १–१ विकेट लिए।