महिला प्रिमियर कप क्रिकेटमा नेपालले हङकङलाई हरायो

काठमाडौं। एसीसी महिला प्रिमियर कप टी–२० क्रिकेटमा नेपालले सुखद सुरुवात गरेको छ।

मलेसियाको सेलाङ्गोर टर्फ क्लबमा शनिबार भएको खेलमा नेपालले हङकङलाई ८ विकेटले पराजित गरेको हो।

९४ रनको लक्ष्य नेपालले १४.१ ओभरमा २ विकेटको क्षतिमा पुरा गरेको हो। नेपालका लागि कप्तान इन्दु बर्माले ४० बनाउँदा सीता राना मगर ३६ रनमा अविजित रहिन्।

दोस्रो विकेटका लागि इन्दु र सीताले ७६ रनको साझेदारी गरे। महिला अन्तर्राष्ट्रिय टी–२० मा नेपालको यो तेस्रो सर्वाधिक साझेदारी पनि हो।

कविता कुँवरले अविजित ४ रन जोड्दा रुबिना क्षेत्री बेलबासे शून्य रनमा अविजित रहिन्। हङकङका लागि इक्रा साहार र चान का मान बेटीले १–१ विकेट लिए।

टस जितेर पहिले ब्याटिङ रोजेको हङकङले पूरै ओभर खेलेर ८ विकेटको क्षतिमा ९३ रन बनायो। कप्तान चान का यिङ करीले २१ र मर्यम बीबीले १९ रन बनाईन्।

नेपालका लागि पुजा महतो र रुबिना क्षेत्रीले २–२ तथा सीता राना मगर र कविता जोशीले १–१ विकेट लिए।

आईतबार हुने खेलमा भुटान र नेपाल आमने सामने हुनेछन्। प्रतियोगितामा सहभागी भएका १६ टोलीलाई ४ समूहमा विभाजन गरिएको छ । नेपाल हङकङ, माल्दिभ्स र भुटानसँगै समूह डीमा रहेको छ।

फाइनल पुग्ने २ टोलीले एसीसी महिला एसिया कप खेल्ने छन्। सेमिफाइनल पुग्ने ४ टोलीले भने इमर्जिङ एसिया कपमा स्थान पक्का गर्नेछन्।