हिँडेर अस्पताल गएकी भिमाको ज्यान गएको एक साता पुग्यो, आफन्तले अझै बुझ्न मानेनन् शव

दैलेख । दैलेखको आठबीस ५ पिपलकोटकी २२ वर्षीया भिमा गुरुङ बलामीको उपचारका क्रममा ज्यान गएको एकसाता पुग्दा पनि शव अझै अस्पतालमा छ ।

हिँडेरै उपचारका लागि कर्णाली प्रादेशिक अस्पताल सुर्खेत पुगेकी उनको पाठेघर सफा गर्ने क्रममा चैत २९ गते ज्यान गएपछि आफन्तले शव बुझेका छैनन् ।

उनमा तल्लो पेट दुख्ने र रगत बग्ने समस्या थियो । नेपाली सेनाको मध्यपश्चिम पृतना बुटवलमा सिपाही पदमा कार्यरत भिमाका श्रीमान् नमराजले हिँडेरै अस्पताल लगेका थिए ।

तर, उपचारका क्रममा ज्यान गयो । परिवार र आफन्तले अस्पतालको टोलीले अप्रेसनमा लापर्बाही गरेको आरोप लगाउँदै शव बुझ्न मानेका छैनन् ।

भिमाको शव अझै अस्पतालमै रहेको छ । मृतका परिवारले उपचारमा लापर्बाही गर्नेलाई कारबाहीको माग राखेर पीडित पक्षले आन्दोलन गर्दै आएका छन् ।

मृतकको आठ महिने छोरीको पालनपोषण र शिक्षाको व्यवस्था, परिवारका एक जनालाई रोजगारी माग गर्दै आएका छन् । आफ्ना मागमा सरकारी पक्षबाट बेवास्ता गरिएको भन्दै पोस्टमार्टम गर्न पीडित पक्षले अस्वीकार गर्दै आएका छन् ।

पीडित पक्षले बिरोधस्वरुप अस्ति कर्णाली राजमार्ग अवरुद्ध गरेका थिए ।

पीडित परिवार, कर्णाली प्रदेश अस्पतालका निर्देशक डा. डम्बर खड्का तथा प्रशासनको टोलीबीच छलफल भए पनि अहिलेसम्म सहमति हुन नसकेको सुर्खेतका प्रमुख जिल्ला अधिकारी शंकरहरि आचार्यले बताए ।