प्रधानमन्त्री कप महिला क्रिकेटमा सुदूरपश्चिमको पहिलो जित

नेपालभ्युज

काठमाडौं। प्रधानमन्त्री कप राष्ट्रिय महिला टी–२० क्रिकेट प्रतियोगितामा सुदूरपश्चिमले लुम्बिनी प्रदेशलाई पराजित गरेको छ।

मूलपानी क्रिकेट मैदानमा शुक्रबार भएको खेलमा सुदूरपश्चिमले लुम्बिनीलाई ९ विकेटले पराजित गरेको हो। यो सुदूरपश्चिमको पहिलो जित हो।

७२ रनको लक्ष्य सुदूरपश्चिमले ९.५ ओभरमा १ विकेटको क्षतिमा पूरा गर्यो। सुदूरपश्चिमका लागि कविता जोशीले अविजित २४ र रेवती धामीले अविजित १७ रन बनाइन्। रुबी पोदारले १४ रन जोडिन्। लुम्बिनीको लागि मधु डीसीले १ विकेट लिइन्।

पहिले ब्याटिङ गरेको लुम्बिनीले पूरै ओभर खेलेर ७ विकेटको क्षतिमा मात्र ७१ रन बनाएको हो। लुम्बिनीका लागि सरस्वती पुनले १९ र आश्मा पुलामी मगरले १६ रन बनाए।

सुदूरपश्चिमका लागि लक्ष्मी साउदले २ तथा रितु कनौजिया, अनु कडायत र इश्वरी विस्टले १–१ विकेट लिए।