काठमाडौं। नेपाली राष्ट्रिय क्रिकेट टोलीका पूर्वकप्तान पारस खड्काले नेतृत्व गर्न चाहेको प्रादेशिक क्रिकेट संघ बागमती प्रदेशको निर्वाचन जारी छ ।
ललितपुरको धोबिघाटस्थित एक होटलमा शुक्रवार प्रदेशको दोस्रो साधारण सभा तथा निर्वाचनले नयाँ नेतृत्व चयन गर्दैछ । अहिलेसम्म पारस र चितवन जिल्ला क्रिकेट संघका प्रतिनिधि उमेश पियाले नेतृत्वमा दाबी गरेका छन् । यद्यपि, शुक्रवार उद्घाटन सत्र सकिएलगत्तै सर्वसम्मति गराउने प्रयास भइरहेको छ । प्रदेशमा कुल ३७ मत छ ।
त्यसमध्ये ६ जिल्लाबाट २४ र कार्यसमितिको १३ जना गरी कुल ३७ जनाले मतदान गर्न पाउनेछन् । उनीहरूको चयनबाट आगामी चार वर्षका लागि १३ सदस्यीय प्रादेशिक क्रिकेट संघको नेतृत्व चयन हुनेछ ।
६ जिल्ला र वर्तमान कार्यसमितिका ७ सदस्यले पारसलाई अध्यक्ष बनाउने सर्वसम्मितिसहित यसअघि नै पत्रकार सम्मेलन गरिसकेकाले उनको दाबेदारी बलियो मानिएको छ । पत्रकार सम्मेलनमा चितवन र नुवाकोटलाई बाहिर राख्दै बाँकी चार जिल्लाले बाँकी पदमा भागभण्डा गर्ने यसअघि नै सार्वजनिक भइसकेको छ ।
क्यानको नेतृत्व गर्ने लक्ष्यसहित राष्ट्रिय क्रिकेट टोलीबाट राजीनामा दिएका पारस प्रदेशको अध्यक्ष जित्दै क्यानको सचिवमा पनि लड्ने योजनामा छन् । उनी काठमाडौं जिल्लाको सदस्य बन्दै प्रदेशको चुनाव लड्न प्रतिनिधि बनेका हुन् ।
Facebook Comment
Comment