पहिचानको विपक्षमा माधव, भने- ‘कोशी नाममै सबैले अपनत्व महसुस गर्नुपर्छ’

काठमाडौं । नेकपा (एकीकृत समाजवादी) का अध्यक्ष एवम् पूर्वप्रधानमन्त्री माधवकुमार नेपालले ‘कोशी’ नाममै सबैले अपनत्व महसुस गर्नुपर्ने बताएका छन् । आइतबार कोशी प्रदेशको राजधानी विराटनगर पुगेका नेपालले पत्रकारहरूसँग कुराकानी गर्दै भनेका छन्, “हामीले सबैलाई सम्झाएर कोशी प्रदेशमै अपनत्व महसुस गरेर अगाडि जानुपर्छ ।”

०७९ फागुन १७ गते तत्कालीन प्रदेश नं. १ को नाम कोशी पारित हुँदा एकीकृत समाजवादी विपक्षमा उभिएको थियो । कोशी प्रदेश, एकीकृत समाजवादीका संसदीय दलका नेता राजेन्द्र राई नेतृत्वको संसदीय दलले त्यसबेला कोशी प्रदेश नामको प्रस्तावको विपक्षमा मतदान गरेको थियो । तर, त्यसको २ महिनापछि त्यहीँ पुगेका अध्यक्ष नेपालले भने पहिचान विरोधी अभिव्यक्ति दिएका हुन् ।

उनले कोशी प्रदेशलाई नै स्थापित गरेर लानुपर्ने बताएका छन् । “कोशी प्रदेशमा सहमति नै भएको रहेछ । त्यसमा हामीले सम्झाएर सबैको पहिचान हो भन्ने स्थापित गरेर सबैले अपनत्व महसुस गरेर जानुपर्छ । यो कुनै संस्कृतिसँग, कुनै धर्मसँग जोडिएको विषय होइन । यो नेपालको प्राकृतिक सम्पदा हो यो । कोशी हामी सबैको गौरब हो । सगरमाथा पनि गौरब नै हुन्थ्यो । यसमा हामीलाई कुनै आपत्ति थिएन । अब कोशीमा सहमति भइसकेपछि त्यसचाहिँ हामीले मानेर सम्झाएर जानुपर्छ ।”

उनले प्रदेशका सांसदहरूले आफूखुसीले निर्णय गरेको बताए । “हाम्रा केही साथीहरूले चाहिँ आफ्नो ढङ्गले चल्ने काम गर्नुभएको भन्ने सुन्नमा आयो ,” उनले भनेका छन्, “अब कोशीलाई नै स्थापित गरेर, यसमै सबैले अपनत्व महसुस गरेर अगाडि जानुपर्छ ।”