कतारी राजाको सुरक्षामा छतदेखि आकाशसम्म सेना, सवारी हुँदा सडक पूरै खाली गरिने, फुटपाथमा उभिन पनि रोक

काठमाडौं । कतारका अमिर (राजा) शेख तमिम बिन हमाद अल थानीको नेपाल भ्रमणलाई लक्षित गरी राजधानी काठमाडौंको सुरक्षा व्यवस्था कडा पारिएको छ ।

भ्रमण सुरु हुनु अघिल्लो दिनदेखिनै गुप्तचर निकायका सुरक्षाकर्मी खटिएका छन् । साथै काठमाडौं भित्रिने विभिन्न नाकामा कडाइका साथ चेकजाँच थालिएको छ ।

कतारी राजा आउनुअघि नै कतारका सुरक्षा निकायका टोली नेपाल आएर सूक्ष्म निगरानी गर्न थालिसकेको छ । उनीहरू सादा पोशाकमा परिचालित भएको गृह मन्त्रालय स्रोतले बताएको छ । भ्रमणपूर्व नै तयारीका लागि ५० भन्दा बढी कतारी प्रतिनिधि काठमाडौं आइसकेका छन् ।

पहिलोपल्ट कतारका राजा नेपाल आउन लागेका हुन् । दुई निजी जहाज लिएर आउन लागेका उनका साथमा आधा दर्जनभन्दा बढी मन्त्री हुनेछन् ।

मङ्गलबार उनीहरू आएदेखि सडकदेखि आकाशमा समेत सुरक्षाकर्मी परिचालन गरिने गृहमन्त्रालय स्रोतले जनाएको छ ।

स्रोतले भन्यो, “राजाको सवारी हुने सडकदेखि अग्ला घरका छतमा पनि अत्याधुनिक हतियारसहितका सेना खटाइने छ । घरका छतमा खटिएका सेनाले अत्याधुनिक दूरबिन प्रयोग गरी निगरानी गर्नेछन् । नेपाली सेनाले हवाई गस्तीसमेत गर्नेछन् ।”

कतारी राजा दुईदिने भ्रमणका लागि मङ्गलबार नेपाल आउने भएपछि नेपाल सरकारले उनको सम्मानमा एक दिन सार्वजनिक बिदा दिने भएको छ ।

बिदा भएकाले सडकमा सवारी साधन अरू दिनको तुलनामा कम चल्नेछन् । यसले कतारी राजाको सवारीमा सडक खाली गरिँदा सकडमा खासै जाम नहुने अनुमान सुरक्षा स्रोतले गरेको छ ।

कसरी खटिन्छन् सुरक्षाकर्मी ?

सुरक्षाका लागि करिब १० हजार सुरक्षाकर्मी काठमाडौंमा परिचालन गरिने गृहमन्त्रालय स्रोतले बताएको छ ।

सडकमा सशस्त्र प्रहरी, नेपाल प्रहरी र अनुसन्धान विभागको टोली परिचालन हुनेछन् । पहिलो घेरामा नेपाल प्रहरी, दोस्रो घेरामा सशस्त्र प्रहरी र तेस्रो घेरामा नपाली सेना रहनेछन् ।

कतारी राजा दुई निजी जहाज लिएर मंगलबार साँझ ५ः३५ बजे काठमाडौं विमानस्थलमा अवतरण गर्नेछन् । तीन एसियाली मुलुकको भ्रमणका लागि गत आइतबार दोहाबाट फिलिपिन्स उडेका कतारी अमिर बंगलादेश हुँदै नेपाल आउनेछन् ।

सुरक्षाकर्मीहरूलाई त्रिभुवन अन्तर्राष्ट्रिय विमानस्थल, सवारी रुट, कतारी राजा बस्ने सोल्टी होटल तथा अन्य संवेदनशील स्थानमा खटाइने छ । साथै काठमाडौं भित्रने विभिन्न नाकामा चेकजाँच कडाइ जारी रहनेछ ।

कतारी राजा काठमाडौं उत्रिएलगतै नै नेपाली सेनाले हवाई गस्ती गर्दै थाल्नेछ । विमानस्थलबाट बस्ने ठाउँ होटल सोल्टी प्रस्थान गर्दा पनि सेनाले ‘एरियल रेकी’ अर्थात् हवाई स्कर्टिङ गरेको छ । कार्यक्रममा जाने बेलामा सडकमा अन्य गाडी र पैदलयात्रीको आवतजावत बन्द गरिनेछ ।

विशिष्ट पाहुनाको भ्रमणलाई लक्षित गरी सुरक्षा प्रबन्धमा कुनै कसर बाँकी नराखिएको प्रहरी केन्द्रीय प्रवक्ता भीम ढकालले बताए ।

सवारीका क्रममा सडक पूर्णरूपमा खाली गरिनेछ भने सडकको दुई किनारमा हिँडडुल गर्न तथा उभिएर हेर्नसमेत रोक लगाइनेछ ।

कतारी राजको सुरक्षार्थ तथा सवारी चलाउनका लागि तैनाथ हुने सुरक्षाकर्मीहरूले सुरक्षा रेकी अर्थात् रिहर्सल’ समेत गरेका छन् ।

गृहमन्त्रालय स्रोतका अनुसार सेना, नेपाल प्रहरी र सशस्त्र प्रहरी सम्मिलित टोलीले त्रिभुवन अन्तर्राष्ट्रिय विमानस्थलदेखि कतारी अमिर रहने सोल्टी होटलसम्म पूरै सुरक्षा व्यवस्थाका साथ सवारी चलाएर ‘रिहर्सल’ गरेका हुन् ।

राष्ट्रपति रामचन्द्र पौडेलको निमन्त्रणामा कतारी राजाको भ्रमण हुन लागेको हो । पहिलोपटक नेपाल भ्रमणमा आउन लागेका कतारी अमिरलाई राष्ट्रपति  पौडेलले मंगलबार त्रिभुवन अन्तर्राष्ट्रिय विमानस्थलमै स्वागत गर्ने भएका छन् ।

परराष्ट्र मन्त्रालयका अनुसार कतारका अमिरले मङ्गलबार राष्ट्रपति पौडेलसँग शीतल निवासमा भेटवार्ता गर्नेछन् ।

राष्ट्रपति पौडेलले मंगलबार बेलुका रात्रिभोजको आयोजना गर्नेछन् । बुधबार प्रधानमन्त्री पुष्पकमल दाहाल प्रचण्ड र कतारी अमिरबीच द्विपक्षीय वार्ता हुनेछ । सो वार्ताका क्रममा केही सम्झौता तथा समझदारीपत्रमा हस्ताक्षर हुन सक्ने जनाइएको छ ।

प्रधानमन्त्री पुष्पकमल दाहाल ‘प्रचण्ड’सँग भने बुधबार द्विपक्षीय वार्ता गरी केही सम्झौता र समझदारीमा हस्ताक्षर हुनेछ । उनी बुधबार बेलुका नै कतार फर्कनेछन् ।

कूटनीतिक सम्बन्ध स्थापना भएको ४७ वर्षपछि कतारबाट उच्चस्तरीय भ्रमण हुन लागेको हो । कतारबाट पहिलोपटक उच्चस्तरीय भ्रमण हुन लागे पनि नेपालबाट भने पटक–पटक उच्चस्तरीय भ्रमण भएका छन् ।

गिरिजाप्रसाद कोइरालाले सन् १९९८ मा कतारको भ्रमण गरेका थिए । सन् २००५ मा तत्कालीन राजा ज्ञानेन्द्र शाह पनि कतार गएका थिए ।

राष्ट्रपति रामवरण यादव र राष्ट्रपति विद्यादेवी भण्डारीले पनि कतारको भ्रमण गरेका थिए ।

कतारी अमिरलाई हात्ती उपहार दिइने

कतारका अमिर (राजा) शेख तमिम बिन हमाद अल थानीको नेपाल भ्रमणका क्रममा दुई हात्ती उपहार दिने तयारी गरिएको छ । ‘रुद्रकली’ र ‘खगेन्द्रप्रसाद’ नामका दुई हात्ती उपहार दिने तयारी गरिएको जनाइएको छ ।