अमेरिकी सभामुख पेलोसीले ताइवान भ्रमण गरेमा चीनले सैन्य आक्रमण गर्न सक्ने

काठमाडौं। अमेरिकी सभामुख न्यान्सी पेलोसीले ताइवानको भ्रमण गरेमा चीनले सैन्य आक्रमण गर्न सक्ने सम्भावना रहेको छ । ह्वाइट हाउसका राष्ट्रिय सुरक्षा प्रवक्ता जोन किर्बीले चीनले न्यान्सी पेलोसीको ताइवान भ्रमणलाई सैन्य उक्साहटका साथ जवाफ दिन सक्ने बताएका बीबीसीले जनाएको छ ।

चीनले ताइवान नजिकै क्षेप्यास्त्र प्रहार गर्ने वा ठूलो मात्रामा हवाई वा नौसेना गतिविधिहरू समावेश हुन सक्ने उनले बताएका छन् । चीनले पेलोसीले ताइवानको भ्रमण गरेमा कडा जवाफ दिने र यसकाे जिम्मेवार अमेरिका नै हुने चेतावनी दिइसकेको छ ।

अमेरिकी प्रतिनिधि सभाकी सभामुख पेलोसी एसिया भ्रमणमा छिन् । ताइवानी र अमेरिकी मिडियाका अनुसार पेलोसी ताइपेई भ्रमण गर्ने योजनामा ​​​​छिन्, तर अमेरिकी सरकारले पुष्टि गरेको छैन।

ताइवान चीनले आफ्नो भूमि दाबी गरेको छ । चीनले अमेरिकी सभामुख पेलोसी त्यहाँ गइन् भने गम्भीर परिणाम निस्कने चेतावनी दिएको छ। सोमबार चीनका संयुक्त राष्ट्रसंघका दूत झाङ जुनले यो भ्रमणले बेइजिङ र वासिङ्टनबीचको सम्बन्धलाई कमजोर बनाउने चेतावनी दिएका छन् छ।

पेलोसीले लामो समयदेखि चिनियाँ नेतृत्वको आलोचना गर्दैआएकी छिन् । चीनले मानव अधिकारको उल्लंघन गरेको र बेला बेला नरसंहार मच्याउँदै आएको अभिव्यक्तिका कारण उनलाई चीनमा निकै खराब नजरले हेर्ने गरिन्छ  ।