राष्ट्रपतिद्वारा लगानी सहजीकरणसम्बन्धी अध्यादेश जारी

काठमाडौं । राष्ट्रपति रामचन्द्र पौडेलले अन्तर्राष्ट्रिय लगानीका लागि सहज बनाउनका लागि भन्दै सरकारले सिफारिस गरेका केही अध्यादेश जारी गरेका छन् ।

लगानीका लागि बाधक र झन्झटिलो ठानिएका ऐन, कानून संसोधनका लागि सिफारिस अध्यादेश राष्ट्रपतिबाट जारी गरिएको हो ।

व्यवसाय सुरु गर्दा हुने प्रक्रियागत झन्झटमा सुधारका लागि सरकारले ९ वटा ऐनलाई अध्यादेशमार्फत् संशोधनका लागि राष्ट्रपतिसमक्ष सिफारिस गरेको थियो । मन्त्रिपरिषद् बैठकको सिफारिसअनुसार राष्ट्रपतिद्वारा अध्यादेश जारी गरिएको शीतल निवासले जनाएको छ ।

अध्यादेशमार्फत् भूमिसम्बन्धी ऐन २०२१, जग्गा प्राप्ती ऐन २०३४, राष्ट्रिय निकुञ्ज तथा वन्यजन्तु संरक्षण ऐन २०२९, विद्युतीय (इलेक्ट्रोनिक) कारोबार ऐन २०६३, विशेष आर्थिक क्षेत्र ऐन २०७३, सार्वजनिक निजी साझेदारी तथा लगानी ऐन २०७५, विदेशी लगानी तथा प्रविधि हस्तान्तरण ऐन २०७५, वन ऐन २०७६, औद्योगिक व्यवसाय ऐन २०७६ संशोधन गरिएको हो ।