जहाजभित्र चुरोट तान्ने यात्रुको बयान– तलतल लाग्यो खप्न सकिनँ

काठमाडौं। काठमाडौँबाट धनगढीका लागि उडेको जहाजमा चुरोट तानेका यात्रुले ‘तलतल लागेकाले खप्न नसकेर तानेको’ बताएका छन्। बुधबार दिउँसो सवा ३ बजे काठमाडौँबाट धनगढीका लागि उडेको जहाजमा चुरोट खाएका कैलालीको टीकापुरका २९ वर्षीय नारायण उपाध्यायले आफू पहिलो पटक जहाजमा चढेकाले जहाजमा चढेकाले चुरोट तान्न नपाउने विषयमा जानकार नभएको बताएका छन्।

अहिले जिल्ला प्रहरी कार्यालय कैलालीको नियन्त्रणमा रहेका उनले आफू रक्सीको नशामा भएकाले अन्जानमा उक्त घटना भएको बयान दिएका छन्।

उपाध्यायले बयान उद्धृत गर्दै कैलालीका डिएसपी वेदप्रकाश जोशीले भने ‘‘काठमाडौं विमानस्थलमा चेकिङ्ग हुँदा सुरक्षाकर्मीले मेरो साथबाट चुरोट र लाइटर भेटाएका थिए। उहाँहरूले फाल्न भनेका थिए। तर मैले नफाली लुकाएर त्यो चुरोट जहाजभित्र पुगाएको थिए। चुरोटको तलतल लागेकाले तानेको हुँ।’’

उनले उडान नं २५३ बाट धनगढी उडेको जहाजको सीट नं ‘११ ए’ मा बसेका उनले जहाजभित्रै चुरोट तानेका थिए। उडिरहेको जहाजभित्र धुवाँ देखेपछि यात्रुहरू आगलागी भएको ठानेर एक छिन आत्तिएका थिए।

जहान धनगढीमा ल्यान्ड हुनासाथ उनलाई धनगढी विमानस्थलमा रहेका प्रहरीले नियन्त्रणमा लिएका थिए। अब पक्राउ परेका उपाध्यायविरुद्ध सार्वजनिक अभद्र व्यवहारमा मुद्दा चलाइने कैलाली प्रहरीका प्रवक्ता समेत रहेका डिएसपी जोशीले बताए।