इलाम-२ को मतगणना आइतबार बिहानदेखि

नेपालभ्युज

काठमाडौं । इलाम -२ को उपनिर्वाचनको मतदान शान्तिपूर्ण रूपमा सम्पन्न भएको छ । शनिबार बिहान ७ बजेदेखि सुरु भएको मतदानको मतगणना आइतबार बिहानदेखि हुने इलामका प्रमुख जिल्ला अधिकारी इन्द्रदेव यादवले जानकारी दिए ।

उनका अनुसार आजै रातिसम्ममा मतपेटिका सङ्कलन गरिसक्ने र भोली बिहान (आइतबार बिहान) सर्वदलीय बैठक बसेर इलाम सदरमुकामस्थित गौतमबुद्धसभा हलमा मतगणना गरिने भएको छ । मतगणनास्थलमा तारबार गरिनुको साथै सीसी टिभी जडान गरिएको उनले बताए । मतगणना दुई स्थानमा गरिने भएको छ । बिहान ३ बजेसम्ममा सबै मतपेटिका मतगणनास्थलसम्म आइपुग्ने बताइएको छ ।

एमालेका सुहाङ नेम्वाङ, काँग्रेसका डम्बर खड्का, राष्ट्रिय स्वतन्त्र पार्टीका मिलन लिम्बू र पहिचानवादीका डकेन्द्रसिंह थेगिम चुनावी मैदानमा रहेका छन् ।