काठमाडौं । सरकारले सन २०३० सम्ममा संघीय संसदमा ४० प्रतिशत, प्रदेश सभामा ४२ प्रतिशत महिला प्रतिनिधित्व गराउने लक्ष्य राखेको छ । यस लक्ष्यमा सरकार प्रतिबद्ध रहेको कानुन न्याय तथा संसदीय मामिला मन्त्री गोविन्द बन्दीले बताएका छन् । मंगलबार प्रतिनिधिसभामा बोल्दै मन्त्री बन्दीले थपे, ‘मलाई लाग्छ, यो लक्ष्यमा दलहरू पनि प्रतिबद्ध छन् ।’
सांसद विन्दा पाण्डेले आगामी निर्वाचनमा प्रदेश र संघीय संसदको निर्वाचनमा महिलाको समानुपातिक सहभागिता गराउनुपर्ने सम्बन्धी जरुरी सार्वजनिक महत्वको प्रस्तावमाथि उठेका प्रश्नहरूको जवाफ दिँदै मन्त्री बन्दीले यस्तो बताएका हुन् ।
नेपालको संविधानले एकात्मक संरचनामा रहेको राज्य प्रणालीलाई संघीय लोकतान्त्रिक संरचनामा बदल्दै जाँदा समावेशी र समानुपातिक सहभागिता गराउने बाचा गरेको उल्लेख गर्दै मन्त्री बन्दीले यसका लागि राजनीतिक इच्छा शक्तिको पनि उत्तिकै भूमिका रहने बताएका छन् ।
‘तल परेको वर्गलाई माथि उठाउन नसक्दासम्म समाज समान ढंगले अगाडि बढ्दैन भनेर समावेशी सहभागिताको कुरा गरिएको हो । यस व्यवस्था कार्यान्वयनका लागि कानुनहरू संशोधन आवश्यक छ । साथसाथै, राजनीतिक इच्छाशक्तिमा भर पर्छ । यसकारण सदलहरूलाई इनकरेज गर्न आवश्यक छ’, मन्त्री बन्दीले भने ।
Facebook Comment
Comment