विवादास्पद अभिव्यक्ति दिएलगत्तै अभिनेत्री मनिषा कोइरालाले भेटिन् दुर्गा प्रसाईं

काठमाडौं । अभिनेत्री मनिषा कोइरालाले ‘भाइरल म्यान’ दुर्गा प्रसाईंलाई भेटेकी छिन् । ‘राष्ट्रवाद’बारे विवादास्पद अभिव्यक्ति दिएर अहिले चर्चामा रहेकी उनले आइतबार भक्तपुरस्थित प्रसाईं निवासमै भेटेकी हुन् ।

शनिबार उनले एक कार्यक्रममा ‘ग्लोबलाईजेसन’ को विरोध गर्दै नेपालमा राष्ट्रवाद कमजोर भएको तर्क गरेकी थिइन् । आइतबार उनी प्रसाईंलाई भेट्न गइन् । प्रसाईं पछिल्लो समय हिन्दू राष्ट र राजसंस्था फर्काउनुपर्छ भन्दै आन्दोलनमा छन् ।

मनिषा कोइरालाको राजनीतिक पृष्ठभूमि हेर्दा उनका यस्ता अभिव्यक्ति अनपेक्षित छैनन् ।

मनिषा कोइरालाले आफ्नो जीवनको अधिकांश समय भारतमा बिताइन् । मूलतः हिन्दीलगायत विभिन्न भारतीय भाषाका सिनेमामा काम गरिन् ।

जीवनभरी भारतीय सिनेमाका लागि काम गरेकी एक अभिनेत्रीले जब ‘राष्ट्रवाद’ का नाममा नेपाली जनतालाई अनावश्यक सङ्कीर्णतातिर उक्साउने प्रयत्न गर्नु शोभनीय नभएको कतिपयको तर्क छ ।

यही मेसोमा ‘नेपाललाई भारतको प्रान्त बनाउनुपर्छ’ भन्दै अन्तरवार्ता दिँदै आएका प्रसाईंलाई मनिषाले भेटेकी हुन् । भेटपछि प्रसाईंले ‘अर्थपूर्ण भेट’ भन्दै फोटो सार्वजनिक गरेका छन् ।

भारतीय सिनेमाको तुलनामा मनिषाले नेपाली वा नेपाली भाषाका सिनेमा एकदमै थोरैमा काम गरेकी छन् । भलै कि उनको सिने जगतमा प्रवेश नेपाली भाषाको ‘फेरि भेटौँला’ बाट भएको थियो । प्रसाईंले फेसबुकमा पोस्ट गरेको फोटोमा केहीले ‘नेपाली राष्ट्रियताको मनिषालाई यति धेरै माया थियो भने देशमै बसेर नेपाली सिनेमाकै लागि किन काम गरिनन् ?’ भनेका छन् ।