काठमाडौं । काठमाडौँमा आजदेखि पुनः मेलम्चीको पानी वितरण सुरु भएको छ । प्रधानमन्त्री पुष्पकमल दाहालले सिंहदरबारस्थित प्रधानमन्त्री कार्यालय परिसरमा रहेको धाराबाट पानी पिएर खानेपानी पुनः वितरणको शुभारम्भ गरेका हुन् ।
आजदेखि पुनः वितरण गरिएको पानी अनामनगर र मीनभवनमा वितरण गरिने छ । त्यसपछि क्रमशः महाँकालचौर, भक्तपुर, खुमलटार, बालाजु र बाँसबारी क्षेत्रमा पु¥याइने खानेपानी मन्त्रालयले जनाएको छ ।
सिन्धुपाल्चोकको अम्बाथानबाट बुधबारदेखि सुरुङमा छाडिएको पानी सुन्दरीजल आइपुगेको थियो । पानी संकलन तथा प्रशोधन केन्द्र सुन्दरीजलमा दैनिक १७ करोड लिटर पानी जम्मा भएको छ ।
बाढीपहिरोका कारण क्षति भएर अवरुद्ध बनेको मेलम्ची खानेपानी आयोजनाको मर्मतपछि पानी पुनः काठमाडौं आइपुगेको हो । बाढी पहिरोका कारण संरचनामा क्षति पुगेपछि अवरुद्ध बनेको मेलम्चीको पानी अवरुद्ध भएको ठाउँमा मर्मत गरेपछि बुधबार साँझदेखि पुनः काठमाडौँमा पथान्तरण गरिएको थियो ।
मनसुन सकिएको लामो समय हुँदा पनि मेलम्चीको पानी नआए पछि काठमाडौँवासी पटक–पटक रित्तो भाडा लिएर प्रदर्शनमा समेत उत्रिएका थिए ।
वर्षायाममा मेलम्ची नदीमा आएको बाढी र पहिरोका कारण खानेपानी आयोजनामा क्षति पुगेपछि बन्द भएको थियो ।
यही पुस ३ गते मेलम्ची खानेपानी विकास समिति र निर्माण व्यवसायी सिनो हाइड्रोबीच २८ दिनमा मेलम्चीको पानी काठमाडौं ल्याउने सहमति भएको थियो ।
Facebook Comment
Comment