काठमाडौं । राष्ट्रिय प्रजातन्त्र पार्टीले पुस २७ गतेदेखि एजेण्डागत कार्यक्रम घोषणा गर्ने तयारी गरेको छ । राप्रपा नेता एवं संसदीय दलका उपनेता बुद्धिमान तामाङले पुस २७ गतेबाट आफ्ना एजेण्डाअनुसारका विभिन्न कार्यक्रमहरु घोषणा गर्ने बताएका हुन् ।
नेता तामाङले राप्रपाको एजेण्डा बोकेर आउने सबैलाई राप्रपाले समर्थन गर्ने बताए । उनले राप्रपाले मंसिर २७ गते कैलाली, २८ गते महेन्द्रनगर र २९ गते जनकपुरमा आमसभा गर्न लागेको बताए ।
तामाङले दुर्गा प्रसाईंको आन्दोलनलाई पार्टीको नैतिक समर्थन रहेको बताएका छन् । उनले व्यवसायी प्रसाईंले गरेको आन्दोलनमा राप्रपाका ६५ प्रतिशत कार्यकर्ताहरु सहभागी भएको दाबीसमेत गरे । उनले आफ्नो पार्टीले कार्यकर्तालाई जानु पनि र नजानु पनि नभनेको उल्लेख गर्दै कार्यकर्ताहरुले आफ्नो इच्छाअनुरुप आन्दोलनमा सहभागी भएको बताए ।
उनले पार्टीका प्रवक्ता एवं संसदीय दलका प्रमुख सचेतक ज्ञानेन्द्र शाही व्यवसायी प्रसाईंले गरेको कार्यक्रममा गइ सम्बोधन गरेको र राप्रपाले नैतिक समर्थन गरेको बताए । कुराकानीमा उनले व्यवसायी प्रसाईंले राखेका विभिन्न मागमध्ये राजासहितको प्रजातन्त्र पुनःस्थापना र हिन्दु राज्य पुनःस्थापना तथा संघीयता खारेजको विषयमा आफूहरुको समर्थन रहेको बताए ।
Facebook Comment
Comment