अब बजार बढ्नुको विकल्प छैन : अध्यक्ष ढकाल

काठमाडौँ । धितोपत्र ब्रोकर एसोसिएसन नेपालका अध्यक्ष सागर ढकालले नेपाल राष्ट्र बैंकले गत हप्ता सार्वजनिक गरेको एकीकृत निर्देशनले पुँजी बजारलाई केही हदसम्म चलायमान बनाउन सहयोग गर्ने बताएका छन् । एसोसिएसनले गरेको एक कार्यक्रममा स्वागत मन्तव्य राख्दै अध्यक्ष ढकालले यस्तो बताएका हुन् ।

‘एकीकृत निर्देशनले सेयर धितो कर्जाको १२ करोड रुपैयाँको सीमालाई केही बढाएको छ त्यसले लगानीकर्ताको समस्या केही हदसम्म सुन्ने र बुझ्ने काम भयो भन्ने ठानेका छौँ,’ उनले भने, ‘अबका दिनका हामीले एक अर्कालाई दोषारोपण भन्दा पनि सकारात्मक सन्देश दिएका अघि बढ्नु जरुरी छ ।’

नेपालमा सेयर बजार र घरजग्गा कारोबारबीच अन्तरसम्बन्ध रहेको र राष्ट्र बैंकको नीतिले घरजग्गा धितो राखेर कर्जा लिन पाउने सीमा बढाउँदा समग्र अर्थतन्त्र चलायमान बनाउन सहयोग पुग्ने उनको धारणा थियो ।

यसै गरी राष्ट्र बैंकले एकै प्रकृतिका कर्जा तथा सापटीको ब्याजदर कायम गर्दा सेयर बजारका लगानीकर्तालाई उच्च ब्याजको पीडाबाट राहत पुग्ने बताए । ‘यसअघि बैंकहरुले राष्ट्र बैंकको नीति अनुसार एउटै प्रकृतिको कर्जामा ५ प्रतिशत विन्दुसम्म फरक गरेर ब्याज लिर्ईरहेका थिए ।’

उनले भने, ‘उक्त नीतिले अबका दिनमा सेयर धितोमा प्रवाह हुने कर्जाको पनि ब्याज घट्ने छ तसर्थ पुँजी बजार सुधारका लागि नियामकको विरोध मात्रै होइन सकारात्मक सोच लिएर अघि बढ्ने सकेमा बजारको विकास र वृद्धि हुने विश्वास छ ।’

तर अहिले बजारमा उच्च रूपमा सप्लाई बढ्दा नकारात्मक सन्देश गएको उनको तर्क छ । ‘अर्थशास्त्रको सिद्धान्त अनुसार बजारले गति लिन माग र पूर्तिको नियम लागू हुनुपर्छ,’ उनले भने, ‘तर पछिल्लो समय उच्च रूपमा आईपीओ आउँदा सप्लाईतर्फ उच्च बढ्यो माग सिर्जना हुन सकेन जसको नकारात्मक असर अहिले बजारमा देखियो ।’ अबका दिनमा बजारमा सप्लाई मात्रै बढाउनु भन्दा पनि माग बढाउनेतर्फ नियामक निकायले ध्यान दिनुपर्ने उनको तर्क छ ।

यसै गरी स्वदेशी तथा विदेशी पुँजी आकर्षित गरी ठूलाठूला पूर्वाधार निर्माणदेखि स–साना स्टार्टअपको सञ्चालनको लागि आवश्यक पुँजीको दीर्घकालीन व्यवस्थापन पूँजीबजारबाट गर्नको लागि सहज हुने हुँदा पुँजी बजारको विकास र विस्तारको विकल्प नरहेको उनको तर्क थियो ।

तथ्यांकलाई नै आधारका मान्दा पछिल्लो विवरण अनुसार हितग्राही खाता ९डिम्याट० खोल्नेको सङ्ख्या करिब ५९ लाखभन्दा बढी रहेको अहिले सेयर बजारमा धेरै नेपालीहरू आबद्ध रहेकाले यसलाई अबका दिनका सकारात्मक सन्देश फैल्याएर सुधारतर्फ लैजानुको विकल्प नरहेको समेत उनले बताए ।

अबका दिनमा इन्ट्रा डे ट्रेडिङ, वन्ड मार्केटको विकाश गर्ने तथा मार्जिन ट्रेडिङ सम्बन्धी नीति ल्याउन आवश्यक छ । साथै तत्कालै सेटलमेन्ट फण्ड ल्याउनुपर्ने समेत उनले बताए ।