आन्दोलनको तेस्रो दिन : सडकमा पातलिए शिक्षक (तस्वीरहरू)

काठमाडौं । शिक्षा विधेयकविरुद्ध आज तेस्रो दिन पनि शिक्षकहरु आन्दोलनमा छन् । सिंहदरबारमा शिक्षक महासंघका प्रतिनिधि र सरकारबीच वार्ताको प्रयास भइरहँदा शिक्षकहरु भने माइतीघरमा भेला भएर र्‍यालीको तयारीमा जुटेका छन् ।

हिजो र अस्तिको तुलनामा आज आन्दोलनका लागि उपस्थित शिक्षकको संख्या कम देखिन्छ । शिक्षक महासंघ र सरकारबीच केहीबेरपछि वार्ता हुने बताइएको छ । शिक्षक महासंघसँग वार्ता गर्नुअघि सरकारका चार मन्त्रीले भने आन्तरिक छलफल गरेका छन् ।

सिंहदरबारमा कार्यवाहक प्रधानमन्त्री पूर्णबहादुर खड्का, गृहमन्त्री नारायणकाजी श्रेष्ठ, शिक्षामन्त्री अशोक राई, कानुनमन्त्री धनराज गुरुङ र सञ्चार मन्त्री रेखा शर्मासहित सचिवहरुबीच छलफल भएको हो ।

बिहीबार साँझ गृहमन्त्री नारायणकाजी श्रेष्ठको नेतृत्वमा ५ मन्त्रीसहित शिक्षक प्रतिनिधिसँग छलफल भएको थियो । छलफलले औपचारिक वार्ताका लागि पत्राचार गर्दै शुक्रबार बिहान पुनः वार्तामा बस्ने समझदारी गरेको थियो ।

सरकारले भाद्र २७ गते संसदमा दर्ता गरेको विद्यालय शिक्षा विधेयकको विरोधमा शिक्षकहरुले बुधबारदेखि काठमाडौं केन्द्रित सडक आन्दोलन गर्दै आएका छन् ।