जिप दुर्घटना हुँदा चालकको मृत्यु

रमेश रावल

सुर्खेत। हुम्लाको सिमकोटबाट हिल्सातर्फ जाँदै गरेको बोलेरो जिप कर्णाली नदीमा खस्दा चालकको मृत्यु भएको छ । चट्टानी भीरको उकालो सडकमा जिप अगाडि बढ्न नसकेर ब्याक भएपछि नदीमा खसेको हो।

सोमबार बिहान साढे सात बजे च्याछरामा कर्णाली प्रदेश ३०१०२२ च ५१२६ नम्बरको बोलेरो जिप दुर्घटना हुँदा शान्तिपुर–२ धनुषा जनकपुरका चालक ३० वर्षका चालक राजेश हेन्जन तामाङको घटनास्थलमै मृत्यु भएको जिल्ला प्रहरी कार्यालय हुम्लाका प्रहरी नायव उपरीक्षक भीमलाल भट्टराईले बताए ।

‘उकालो भीरमा गाडी चढ्न नसक्ने भन्दै चालक तामाङले १२ जना यात्रुलाई झारेर आफूले गाडी चलाएका थिए ।’ उनले भने,‘चालकको मृत्यु भए पनि दुर्घटनाबाट ठूलो मानवीय क्षति हुनबाट जोगियो ।’