नेपाल टी–२० लिगमा फारवेस्टको सङ्घर्षपूर्ण पहिलो जित

काठमाडौं। फारवेस्ट युनाइटेडले नेपाल टी–२० क्रिकेट लिगमा सङ्घर्षपूर्ण पहिलो जित निकालेको छ।

त्रिवि अन्तर्राष्ट्रिय क्रिकेट मैदानमा सोमबार बिहान भएको खेलमा युनाइटेडले काठमाडौं नाइट्सलाई ४ विकेटले पराजित गरेको हो। सङ्घर्षपूर्ण जित निकालेको युनाइटेड चौथो स्थानमा उक्लिएको छ।

९९ रनको सामान्य लक्ष्य युनाइटेडले १९.१ ओभरमा ६ विकेट गुमाएर भेटायो। युनाइटेडको लागि हशमतुल्लाह शाहिदीले ५० र देव खनालले १७ रन बनाए। काठमाडौंको लागि अनिल खरेलले २ तथा अविनास बोहोरा, बसिर अहमद, अजमातुल्लाह उमरजाई, रायन बर्लले १–१ विकेट लिए।

पहिले ब्याटिङ गरेको काठमाडौंले पूरै ओभरमा ९ विकेट गुमाएर ९८ रन बनायो। काठमाडौंको लागि एलेक्स ब्लेकले अविजित ४५ र कप्तान ज्ञानेन्द्र मल्लले १३ रन बनाए। युनाइटेडको लागि उमर अलीले ३ तथा हशमतुल्लाह र भुवन कार्कीले २–२ तथा शेर मल्लले १ विकेट लिए ।

अर्को खेलमा जनकपुर रोयल्स र विराटनगर सुपर किङ्स दिउँसो सवा १ बजे भिड्दै छन्।