जनकपुरधाम। धनुषाको विभिन्न मतदान केन्द्रमा खटिने मतदान अधिकृत तथा सहायक मतदान अधिकृतहरूले निर्वाचनसम्बन्धी सामग्रीहरू बुझ्ने क्रम आज बिहानदेखि नै शुरु भएको छ ।
जनकपुरधामको निधि भवनमा रहेको मुख्य निर्वाचन अधिकृत तथा अन्य तीन वटा निर्वाचन अधिकृतको कार्यालयबाट निर्वाचन सम्बन्धी ५२ प्रकारका सामाग्रीहरू बुझिरहेका छन् ।
यसैगरी सहायक कर्मचारीहरूले पनि निर्वाचनमा खटेबापत पाउने भत्ता पनि बुझिरहेको मुख्य निर्वाचन अधिकृत ब्रजेश प्याकुरेलले जानकारी दिएका छन् ।
धनुषा जिल्लामा रहेको ४ वटा प्रतिनिधिसभा निर्वाचन क्षेत्र र ८ वटा प्रदेशसभाको निर्वाचन क्षेत्रमा गरेर ३ सय २२ मतदान स्थलमा ६ सय ५ मतदान केन्द्रहरू रहेका छन्। जसमध्ये अतिसंवेदनशील १९४ वटा, संवेदनशील १११ र वटा १७ वटा सामान्य मतदान स्थल रहेका छन् ।
सबै मतदान केन्द्रका मतदान अधिकृत तथा सहायक मतदान अधिकृतहरूले निर्वाचनमा प्रयोग हुने सामाग्रीहरू बुझेर रुजु गर्दै आफ्नो कार्यक्षेत्र तिर प्रस्थान गर्दै गरेका छन् ।
निर्वाचन अधिकृत तथा सहायक निर्वाचन अधिकृतहरू खटिएको निर्वाचन क्षेत्रमा पुगेर निर्वाचन निर्देशिका तथा मतदान निर्देशिका अनुसार सूचना प्रकाशित गरिसक्नु पर्ने व्यवस्था रहेको छ ।
पाँच बजेसम्ममा मदिरा निषेधित क्षेत्र, चार किल्ला तथा मतदान केन्द्र तोकिएको विषयमा सूचना जारी गरिसक्नु पर्ने कानूनी व्यवस्था रहेको छ ।
प्रतिनिभिसभा तर्फ धनुषाको निर्वाचन क्षेत्र नम्बर–१ मा २५ जना, क्षेत्र नम्बर–२ मा १६ जना, क्षेत्र नम्बर–३ मा ३१ र क्षेत्र नम्बर–४ मा ३१ जना उम्मेदवार छन् । यस्तै प्रदेशसभा १ को (क) मा १४ जना, (ख) मा १४ जना उम्मेदवार छन् भने २ को (क) मा १४ जना र (ख) मा १७ जना उम्मेदवार छन् । त्यस्तै, ३ को (क) मा २० जना र (ख) मा २७ तथा ४ को (क) मा १९ जना र (ख) मा १३ जना उम्मेदवार छन् ।
धनुषामा निर्वाचनका लागि ४ हजार ८४० कर्मचारी खटिएका छन् । प्रत्येक मतदान केन्द्रमा ८ जनाको हिसाबले कर्मचारी खटाइएको छ । ८ जनामध्ये प्रत्येक मतदान केन्द्रमा १ जना मतदान अधिकृत, १ जना सहायक मतदान अधिकृत, ५ जना सहायक कर्मचारी र १ जना कार्यालय सहयोगी रहनेछन् ।
मतदाता संख्याको आधारमा प्रत्येक मतदान केन्द्रका मतदान अधिकृतले ३ देखि ४ जनासम्म स्वयंसेवक समेत खटाउन पाउने प्रदेश निर्वाचन कार्यालयले जनाएको छ ।
मंसिर ४ गते हुने निर्वाचनमा यस जिल्लामा २ लाख ५२ हजार ९१५ पुरुष, २ लाख २१ हजार ६६५ महिला र अन्य ७ गरी कुल ४ लाख ७४ हजार ५८७ जनाले आ–आफ्नो मताधिकारको प्रयोग गर्ने भएका हुन् ।
Facebook Comment
Comment