प्रदेश १ को तीन सिटमा गठबन्धन र एमालेबीच टक्कर, राप्रपा निर्णायक

विराटनगर। राष्ट्रियसभा सदस्य निर्वाचन अन्तर्गत प्रदेश १ मा तीन जना सदस्य निर्वाचित गर्न मतदान शुरु भएको छ।

बुधबार बिहान ९ बजेदेखि विराटनगर–१० स्थित प्रदेश निर्वाचन कार्र्यालय र बाली संरक्षण कार्यालयमा मतदान शुरु भएको होे। पालिकाका प्रमुख तथा उपप्रमुखका लागि विराटनगर–१० स्थित प्रदेश निर्वाचन कार्यालय र प्रदेशसभा सदस्यका लागि बाली संरक्षण कार्यालयलाई मतदान केन्द्र तोकिएको छ।

आजको मतदानमा प्रदेश १ का स्थानीय तहका प्रमुुख तथा उपप्रमुख र प्रदेशसभाका सदस्य गरी प्रदेश १ मा कुल ३६४ जनाले मतदान गर्दैछन्।

प्रदेश १ बाट तीन जना राष्ट्रियसभा सदस्य पदका लागि पाँचदलीय गठबन्धनबाट तीन, नेकपा एमालेबाट तीन र राप्रपाबाट दुई गरी ८ जना प्रतिस्पर्धामा छन्।

जसमा नेपाली कांग्रेसका तर्फबाट अन्यमा झापाका गोपाल बस्नेत, नेकपा एकीकृत समाजवादीका तर्फबाट महिलामा भोजपुरकी जयन्ती राई र जनता समाजवादी पार्टीका तर्फबाट अल्पसंख्यकमा भोजपुरकै हेमराज राई थुलुङ चुनावी मैदानमा छन्।

नेकपा एमालको तर्फबाट अन्यमा मोरङका गुरु बराल, महिलामा झापाकी सुमित्रा भण्डारी र अल्पसंख्यकमा सोलुखुम्बुकी सोनाम ग्याल्जेन शेर्पा प्रतिस्पर्धामा छन्। यस्तै, राष्ट्रिय प्रजातन्त्र पार्टीबाट पनि खुल्लामा झापाका अमर विष्ट र महिलामा रञ्जु प्याकुरेल उम्मेदवार छन्।

कार्यकाल सकिएर २० फागुनमा प्रदेश १ बाट राष्ट्रियसभा सदस्यको तीन पद खाली हुँदैछ। कार्यकाल सकिन लागेका तीनै सदस्य यसअघि एमालेबाट निर्वाचित भएका थिए। एमालेका परशुराम मेघी गुरूङ, अगमसिंह वान्तवा र नैनकला ओझा यसअघि निर्वाचित राष्ट्रियसभा सदस्य हुन्।

कसको मतभार कति ?
राष्ट्रियसभा निर्वाचनका लागि प्रदेश १ मा स्थानीय तहका प्रमुख, उपप्रमुख र प्रदेशसभाका सदस्य गरी कुल ३६४ मतदाता छन्। राष्ट्रियसभा निर्वाचनमा प्रदेशसभा सदस्यको मतभार ४८ र स्थानीय तहका जनप्रतिनिधिको मतभार १८ हुने कानूनी व्यवस्था छ। जसअनुसार प्रदेश १ मा ९२ प्रदेशसभा सदस्यहरुको मतभार ४ हजार ४१६ र २७२ जना पालिका प्र्रमुख तथा उपप्रमुखको मतभार ४ हजार ८९६ छ।

निर्वाचनमा प्रदेशसभाका ९३ जना मतदाता हुनुपर्नेमा टङ्क आङ्बुहाङ माओवादी केन्द्रको कारबाहीमा परेपछि हाल उनको पद रिक्त रहेको छ। बाँकी १३७ स्थानीय तहमा २७४ मतदाता हुनुपर्नेमा दुई जनाको निधन भएको कारण स्थानीय तहको कुल मतदाता २७२ मात्र हुन्।

सोलुखुम्बुको खुम्बु पासाङल्यामु गाउँपालिकाका अध्यक्ष ङिम दोजी शेर्पा र भोजपुरको हतुवागढी गाउँपालिका उपाध्यक्ष चन्द्रमा राईको निधन भएकाले उनीहरुको पद रिक्त छ।

प्रदेश १ मा नेकपा एमालेका जनप्रतिनिधिहरुको कुल मतभार ४ हजार ५२४ छ भने पाँचदलीय गठबन्धनको कुल मतभार ४ हजार ६६८ छ। जसमा गठबन्धनमा आबद्ध नेपाली कांग्रेसको दुई हजार ७३६, नेकपा माओवादी केन्द्रको एक हजार ८, नेकपा (एकीकृत समाजवादी)को ६६०, जनता समाजवादी पार्टीको २१६ र संघीय लोकतान्त्रिक राष्ट्रिय मञ्चको ४८ मतभार छ।

प्रदेशसभा सदस्य तीन, गाउँपालिका अध्यक्ष दुई र उपाध्यक्ष दुई रहेको जनता समाजवादी पार्टीसँग २१६ मतभार छ भने अध्यक्ष तीन, उपाध्यक्ष एक र प्रदेशसभा सदस्य एक रहेको राप्रपासँग १२० मतभार छ।

प्रदेशसभामा एक सांसद रहेको संघीय लोकतान्त्रिक राष्ट्रिय मञ्चसँग ४८ मतभार रहेको छ । प्रदेशमा गठबन्धन र एमालेबाहेक राप्रपासँग १२० मतभार रहेको छ ।