बझाङमा भेटियो दुई जनाको शव

धनगढी। बझाङमा दुई जना पुरुष मृत अवस्थामा फेला परेका छन्। मृत फेला पर्नेमा एक जना छबिसपाथीभेरा ७ का र एक जना सुर्मा –१ का रहेका छन्। उनीहरु फरक फरक ठाउँमा मृत अवस्थामा फेला परेका हुन्।

छबिसपाथिभेरा गाउँपालिका ७ बुड्खोरीका ४३ वर्षीय जंग धामी घर नजिकै नौपाते भन्ने ठाउँमा मृत फेला परेका हुन्। उनी बिहीबार बिहान मृत अवस्थामा फेला परेका प्रहरीले जनाएको छ।

यस्तै, सुर्मा गाउँपालिका १ दौलीचौरका ४४ वर्षीय किट्टु बोहरा मंगलबारदेखि घरबाट हराएका र हिजोसम्म घर नफर्केपछि खोजतलास गर्दा घरबाट केही टाढा पदाली भन्ने ठाउँमा मृत फेला परेको जिल्ला प्रहरी कार्यालय बझाङ सूचना अधिकारी प्रहरी निरीक्षक लोकेन्द्रसिंह कार्कीले बताए।

धामी र बोहरा दुवै जनाको चिसोले कठ्यांग्रिएर ज्यान गएको हुन सक्ने प्रहरीको आशंका छ।

दुवै जनाको मृत्युबारे थप अनुसन्धान गर्न र पोष्टमार्टमका लागि जिल्ला अस्पताल सिमिखेत ल्याउन प्रहरी टोली घटनास्थल तर्फ खटाएको जिल्ला प्रहरी कार्यालय बझाङले जनाएको छ ।