सलमान खानको घरमा गोली चलाउने सुटर कालु को हुन् ?

काठमाडौं । आइतबार बिहान मुम्बईको बान्द्रा वेस्टमा रहेको बलिउड अभिनेता सलमान खानको अपार्टमेन्टमा गोली चलेको थियो ।

यस घटनामा प्रहरीले गोली चलाउने र गराउने व्यक्तिको बारेमा ठोस जानकारी पाएको छ ।

गोली प्रहारको जिम्मेवारी लरेन्स ग्याङका अनमोल बिश्नोई, गोल्डी बरार र रोहित गोदाराले लिएका छन् ।

सोही क्रममा सलमानको घर बाहिर गोली चलाउने व्यक्ति विशाल उर्फ ​​कालु रोहित गोदारा गिरोहका हुन् ।

सीसीटीभी फुटेजमा देखिए आक्रमणकारी
सलमानको घर बाहिर गोली चलाउने दुई आक्रमणकारीको तस्विर सार्वजनिक भएको छ ।

एक आक्रमणकारी कालो र सेतो टी-सर्टमा देखिएका छन्, जबकि अर्को रातो टी-सर्टमा।

यससँगै २९ फेब्रूअरी २०२४ को सीसीटीभी फुटेज पनि फेला परेको छ, जुन हरियाणाको रोहतकमा रहेको ढाबाको हो।

मुम्बईमा सलमानको घर अगाडि भेटिएको सीसीटीभी फुटेजमा देखिएका व्यक्तिको अनुहारसँग यो सुटर कालुको अनुहार मिल्छ ।

सलमान खानको घर बाहिर कालु उर्फ ​​विशाल राहुलले गोली चलाएको आशंका छ ।

यसअघि आइतबार फेसबुक पोस्टमार्फत् अमेरिकामा लुकेर बसेका गुण्डा अनमोल बिश्नोईले पुरानो दुश्मनीका कारण सलमान खानको घरमा गोली चलाएको स्वीकार गरेका थिए ।

सुरुमा प्रहरीले पनि यो फेसबुक पोस्टलाई गम्भीरताका साथ लिएको थिएन । तर, सीसीटीभी फुटेजमार्फत गोली प्रहार गर्नेहरूको अनुहार खुल्नेबित्तिकै सबै कुरा प्रष्ट भयो ।

को हुन् विशाल राहुल उर्फ ​​कालु ?
कालु राजस्थानका कुख्यात ग्याङ्स्टर रोहित गोदाराका विशेष सुटर हुन्। रोहित गोदरा लरेन्स गिरोहसँग सम्बन्धित छन् ।

कालुले भर्खरै रोहतकका स्क्र्याप व्यवसायी सचिन गोडाको हत्या गरेका थिए, जसको सीसीटीभी फुटेज र हत्याको जिम्मेवारी लिने पोस्ट पनि सोशल मिडियामा जारी गरिएको थियो।

गुरूग्राम निवासी कालुले १० कक्षासम्म पढेका छन् । उनीविरूद्ध गोली हानाहान, मोटरसाइकल चोरी लगायतका कैयौं आपराधिक मुद्दा छन् ।