काठमाडौं । संयुक्त किसान मोर्चालगायतका किसान संगठनले आज ग्रामिण भारत बन्दको आव्हान गरेका छन् । किसानको मागको समर्थन गर्दै संयुक्त किसान मोर्चाले भारत बन्दको घोषणा गरेको हो ।
सरकारसँग तीन चरणसम्म भएका वार्ता निश्कर्षविहिन भएको भन्दै ग्रामिण भारत बन्दको आव्हान गरिएको किसान मोर्चाका नेता जगजीत सिंह डल्लेवालले बताए ।
किसान मोर्चाले किसानको मागलाई समर्थन गर्ने अन्य संगठनलाई पनि भारत बन्द गर्न अपिल गरेको छ । किसानको मागमा समर्थन जनाउदै देशभरका केही श्रमिक संगठनले पनि साथ दिएको भारतीय सञ्चार माध्यमहरुले जनाएका छन् ।
सरकारले न्यूनतम समर्थन मूल्य तोक्नुपर्ने, कृषि ऋण मिनाह हुनुपर्ने लगायतका माग राख्दै किसानहरु आन्दोलित भएका हुन् ।
बन्दका कारण आज खेतीपातीसँग सम्बन्धित गतिविधि बन्द छ । साथै बजार, पसल र अन्य कामहरु पनि बन्द छन् । बन्दलाई कांग्रेस, कम्युनिष्ट लगायतका पार्टी र किसान संगठनहरुले पनि समर्थन गरेका छन् ।
बन्दमा सहभागी हुन दिल्लीतर्फ आएका पञ्जाबका किसानलाई हरियाणामा रोकिएको छ । उनीहरुलाई दिल्ली प्रवेशमा रोक लगाउन सुरक्षाकर्मीले बल प्रयोग गरेका थिए ।
प्रहरीले अश्रु ग्याँस प्रयोग गरेर किसानको भिडलाई राजधानी प्रवेशमा रोक लगाएका भिडियो फुटेजहरु सार्वजनिक भएका छन् ।
किसानको आन्दोलनका कारण राजधानी दिल्लीलगायत धेरै राज्यमा सुरक्षा व्यवस्था कडा पारिएको छ ।
दिल्ली प्रशासनले आन्दोलनकारीलाई दिल्ली प्रवेशमा निषेध गर्न सुरक्षाकर्मीको तैनाथी बढाएको द हिन्दुले जनाएको छ ।
Facebook Comment
Comment