कोशीमा मन्त्रिपरिषद् विस्तारको अन्योल, माओवादीलाई ल्याए आफूले सरकार छाड्ने एमालेको चेतावनी

काठमाडौं। कांग्रेसभित्र विद्रोह गर्दै नेकपा एमालेको समर्थनमा कोशी प्रदेशको मुख्यमन्त्री बनेका केदार कार्कीको सरकार विस्तारमा ढिलाइ भएको छ।

यसले मुख्यमन्त्री कार्कीलाई अप्ठ्यारोमा पारेपछि नेपालको संविधानको धारा १६८ को ५ बमोजिम बनेको कोशी प्रदेश सरकारको राजनीतिक संकट अझै उस्तै छ ।

मुख्यमन्त्री कार्की आफूलाई विश्वासको मत दिने सबै दलहरूलाई समेटेर मन्त्रिपरिषद् विस्तार गर्न चाहन्छन् । उनलाई राष्ट्रिय प्राजतन्त्र पार्टी (राप्रपा) बाहेक सबै दलले विश्वासको मत दिएका थिए । ती सबै दलको सहभागितामा मन्त्रिपरिषद् विस्तार गर्न चाहन्छन् उनी ।

एमालेलाई सरकारबाट बाहिर राख्नुपर्ने पार्टीको केन्द्रीय नेतृत्वको दबाब छ । उता गठबन्धन दललाई सरकारमा सहभागी गराए बाहिरिने एमालेको चेतावनी छ। जसकारण सरकार विस्तारमा ढिलाइ भएको छ।

मुख्यमन्त्री कार्की अझै सबैलाई समेटेरै लाने प्रयासमा छन् । एमालेको अडानका बाबजुत पनि उनी अझै सहमति जुटाउने प्रयासमै छन् । उनले मङ्गलबार बिहान मात्रै कोशी एमालेका प्रमुख सचेतक रेवतीरमण भण्डारीसँग मन्त्रिपरिषद् विस्तारकै सन्दर्भमा संवाद गरेका थिए । संवादका क्रममा भण्डारीले सबैलाई समेटे आफूहरू सरकारमा नरहने बताएका छन् ।

उनी दुवै पक्षलाई सर्वदलीय सरकारका लागि सहमत गराउने प्रयासमा छन् । मुख्यमन्त्री कार्कीले सर्वदलीय सरकार गठनको पहल भइरहेको बताए । छलफल गरी यही हप्ता सरकार विस्तार गर्ने तयारी रहेको उनको भनाइ छ ।

तर, नेकपा एमालेले कांग्रेस–एमालेको मात्रै सरकार विस्तारका लागि दबाब दिइरहेको छ । तर मुख्यमन्त्री कार्की सत्तारुढ गठबन्धनलाई बाहिर राखेर अघि बढ्न नसक्ने अवस्थामा छन् ।

एमाले भने कांग्रेस–एमालेको मात्रै सरकार भएका कारण अन्य दललाई सहभागी नगराउने अडानमा छ । माओवादी केन्द्रसहित गठबन्धन दललाई सहभागी गराए सरकार छाड्ने चेतावनी दिएको छ । तर, मुख्यमन्त्री कार्की संकटमा साथ दिएको एमालेलाई तत्कालै छाड्न तयार छैनन् ।

नेकपा एमाले प्रमुख सचेतक रेवतीरमण भण्डारीले कोशी सरकारमा केन्द्रीय गठबन्धनका दल मिसिए एमाले सरकारबाट बाहिरिने बताए ।

गठबन्धनसम्बद्ध दलका नेताहरू भने सहमति भएर मात्रै मन्त्रिपरिषद् विस्तार हुने बताउँछन् । माओवादी केन्द्रका एक नेताले भने, “तत्कालै सरकार विस्तार हुने सम्भावना न्यून छ । सहमति भएको छैन । सहमतिबेगर सरकार विस्तार हुने कुरा भएन । मुख्यमन्त्रीजीले संवाद गर्दै हुनुहुन्छ ।”