एमाले लुम्बिनीको नेतृत्व छान्न मतदान जारी

काठमाडौं । नेकपा  एमाले लुम्बिनी प्रदेशको अधिवेशनमा नेतृत्व चयनका लागि मतदान भइरहेको छ ।

मुख्य निर्वाचन अधिकृत हरिप्रसाद भण्डारीका अनुसार निर्वाचन कमिटीले ८ बजे मतदान सुरु गर्ने गरी तयारी गरेपनि केही ढिला गरी सुरु भएको हो ।

यसअघि सोमबार रातिदेखि मतदान गर्ने भनिए पनि अन्तिम समयमा आन्तरीक तयारी नपुगेको र अध्यक्ष मण्डलले उज्यालोमा मतदान गर्न आग्रह गरेकाले समय सारिएको थियो ।

सहमतिको प्रयास असफल भएपछि सुरु भएको निर्वाचन प्रक्रियामा पाँच पदाधिकारीका लागि १५ जनाको उम्मेदवारी परेको छ । अध्यक्षमा पाल्पाका राधाकृष्ण कँडेल र प्यूठानका हरि रिजालले उम्मेदवारी दर्ता गराएका छन् । कँडेल उपाध्यक्ष विष्णु पौडेल र रिजाल महासचिव शंकर पोखरेल निकटका हुन् ।

उपाध्यक्षमा रुपन्देहीका भोजप्रसाद श्रेष्ठ, विश्वराज बराल र बाँकेका पूजन विश्वकर्माको उम्मेदवारी परेको छ ।

सचिवमा दाङका लक्ष्मण आचार्य निर्विरोध भइसकेका छन् । त्यस्तै उपसचिव खुलामा उपेन्द्रलाल कामी–रुकुम पूर्व, दुर्गाप्रसाद थारू चौधरी–बाँके, पूर्ण बुढामगर–रोल्पा र हिरा एसी–गुल्मीको उम्मेलदवारी परेको छ । महिला उपसचिवमा बाँकेकी आरती पौडेल, वसन्ती अधिकारी र बाँकेकी लीला रानामगरको उम्मेदवारी परेको एमालेले जनाएको छ ।

बुटवलको अन्तर्राष्ट्रिय सम्मेलन केन्द्रमा चलिरहेको एमालेको लुम्बिनी प्रदेश अधिवेशनका लागि १२ वटै जिल्ला र विभिन्न २३ वटा जनसङ्गठनहरुबाट छानिएका गरी १ हजार ४ प्रतिनिधिहरु सहभागी छन् ।