सुर्खेत। कर्णाली प्रदेश सरकारले कर्णालीका हिमाली तथा दुर्गमका जिल्लामा नियमित हवाई उडान गर्न माग गरेको छ । कर्णाली प्रदेश सरकारको उद्योग, पर्यटन, वन तथा वातावरण मन्त्रालयले नियमित हवाई उडान गर्नका लागि नेपाल सरकारसँग माग गरेको हो ।
नेपाल नागरिक उड्डयन प्राधिकरणले साउन १२ गतेदेखि १२ बजेपछि उडान गर्न नपाउने निर्णय गरेका कारणले कर्णालीका हिमाली जिल्ला हुम्ला, जुम्ला, डोल्पा र मुगुमा १३ साउनबाट कर्णालीमा हवाई सेवा प्रभावित भएको छ ।
कर्णालीका हिमाली तथा पहाडी जिल्लामा सडक सञ्जालको भरपर्दो माध्यम नभएका र वर्षाका कारणले सडक अवरुद्ध भइरहने कारणले नियमित हवाई उडान गर्न माग गरिएको कर्णाली प्रदेश सरकारको उद्योग, पर्यटन, वन तथा वातावरण मन्त्रालयका सचिव डा. विनोदप्रसाद देवकोटाले बताए ।
‘नेपाल नागरिक उड्डयन प्राधिकरणले भदौ १२ गते गरेको निर्णयको असर कर्णाली प्रदेशमा बढी परेको छ ।’ उनले भने,‘अत्यावश्यक तथा आकस्किम खाद्यान्न ढुवानी, स्वास्थ्य सेवा प्रवाह र प्राकृतिक प्रकोपबाट पीडितलगाएतका सेवा उपलब्ध गराउन कठिन बनेको छ ।’
डोल्पामा एक महिनापछि जहाज
मौसम सुधारसँगै डोल्पाको जुफाल विमानस्थल जहाज पुगेको छ । नेपालगञ्ज डोल्पा आउने जहाजको आकाशे मार्ग अवरुद्ध भई २६ दिनसम्म हवाई सेवा बन्द भएको र मौसममा सुधार आई आकाश खुलेसँगै बुधबार नेपालगञ्जबाट डोल्पाको लागि तारा एयरलाइन्सको जहाजले एउटा उडान भरेको नेपाल नागरिक उड्डयन प्राधिकरण डोल्पाका प्रमुख अमितकुमार चौरसियाले बताए ।
‘मौसममा सुधार आएपछि उडान भएको तर प्राधिकरणले बिहान ६ बजेपछि दिउँसो १२ बजेसम्म मात्र उडान गरिने गरी बनाएको मापदण्डमा फेरबदल छैन ।’ उनले भने,‘यसको असर नागरिकमा स्वाभाविकै रूपमा परेको छ ।’
Facebook Comment
Comment