एजेन्सी। इन्डियन प्रिमियर लिग आइपिएल क्रिकेटमा दिल्ली क्यापिटल्सले रोयल च्यालेन्जर्स बेंगलोरलाई ७ विकेटले हराएको छ ।
१ सय ८२ रनको लक्ष्य पछ्याएको दिल्लीले १६.४ ओभरमा ३ विकेट गुमाउँदै पूरा गर्यो । दिल्लीको जितमा फिलिप साल्टले ४५ बलमा ८ चौका र ६ छक्कासहित सर्वाधिक ८७ रन बनाए ।
राइली रोसोउ २२ बलमा १ चौका र ३ छक्कासहित ३५ रनमा नटआउट रहे । ओपनर डेविड वार्नरले २२ र मिचेल मार्शले २६ रन बनाए । बेंगलोरका जोश हेजलवुड, कर्ण शर्मा र हर्षल पटेलले समान एक विकेट लिए ।
त्यसअघि अरुण जेट्ली स्टेडियम दिल्लीमा टस जितेर पहिला ब्याटिङ रोजेको बेंगलोरले निर्धारित २० ओभरमा ४ विकेट गुमाउँदै १ सय ८१ रन बनाएको थियो ।
बेंगलोरका युवा खेलाडी महिपाल लोमरोर ५४ रनमा अविजित रहे । बेंगलोरलाई फाप डु प्लेसिसले ४५ र विराट कोहलीले ५५ रन बनाए । दिल्लीका मिचेल मार्शले २ विकेट लिए ।
दिल्ली १० खेलमा ४ मा जित र ६ मा हारसहित ८ अंकका साथ नवौं स्थानमा छ । बेंगलोर १० खेलमा ५ मा जित र ५ मा हारसहित १० अंकका साथ पाँचौं स्थानमा छ ।
Facebook Comment
Comment