राजनीतिक खेल रोमाञ्चक मोडमा पुगेपछि बाबुरामको प्रश्न- ‘टाइब्रेकर’मै पुग्ने त होइन ?

काठमाडौं। पूर्वप्रधानमन्त्री तथा नेपाल समाजवादी पार्टीका अध्यक्ष डा. बाबुराम भट्टराईले सरकार गठनको खेल रोमाञ्चक मोडमा पुगेको बताएका छन्।

सामाजिक सञ्जाल ट्विटरमा लेख्दै उनले ‘वल्र्डकप फुटबल जस्तै राजनीतिक खेल ‘टाइब्रेकर’मा पुग्ने त हैन’ भन्ने प्रश्न गरेका छन्।
‘‘हालै सम्पन्न वर्ल्डकप फुटबलको फाइनल र नेपाली राजनीतिको खेल आज ‘टाइब्रेकर’सम्मै उस्तै रोमाञ्चक हुन लागेको हो ?’’ भट्टराईको प्रश्न छ।

हालै सन्पन्न वर्ल्डकप फुटवलको फाइनल र नेपाली राजनीतिको खेल आज ‘टाइब्रेकर’ सम्मै उस्तै रोमान्चक हुन लागेको हो?

— Baburam Bhattarai (@brb1954) December 25, 2022

बालुवाटार बैठकमा सत्ता गठबन्धनमा कुरा नमिलेपछि माओवादी केन्द्र एमाले अध्यक्ष ओलीकहाँ पुगेका छन्।

आइतबार बिहान बालुवाटारमा बसेको सत्ता गठबन्धनको बैठकमा कांग्रेसले प्रधानमन्त्री र राष्ट्रपति दुवै पद नछाडेपछि प्रचण्ड ‘गठबन्धन तोडियो’ भन्दै बैठक छाडेर हिँडेका थिए।

अहिले एमाले अध्यक्ष ओली निवासमा पाँच दलको बैठक छलफल चलिरहँदा सरकार गठनको प्रयास रोमाञ्चक मोडमा पुगेको छ।