सुर्खेत विमानस्थलमा बुद्ध एयरको ७२ सिटे जहाजको परीक्षण उडान सफल

सुर्खेत। सुर्खेत विमानस्थलमा बुद्ध एयरको ७२ सिटे जहाजको परीक्षण उडान सफल भएको छ । बुधबार बुद्ध एयरको एटीआर ७२ विमान सुर्खेत विमानस्थलमा सफलतापूर्वक अवतरण गरेको हो ।

नेपाल नागरिक उड्डयन प्राधिकरणको सहयोग तथा सहकार्यमा बुद्ध एयरको ७२ सिट भएको जहाजको परीक्षण उडान सफल भएको छ ।
बुद्ध एयरले एटीआर ४२ जहाजबाट सुर्खेत–काठमाडौं नियमित उडान भर्दै आइरहेको थियो ।

परीक्षण उडान अनुकूल रहेको अवस्थामा २०२३ जनवरीदेखि सुर्खेत–काठमाडौं दैनिक दुई उडान सञ्चालन गर्ने योजना रहेको बुद्ध एयरले एक विज्ञप्ति जारी गर्दै जनाएको छ ।

बुद्ध एयरका अनुसार उक्त एटीआर ७२ विमानमार्फत् उडान संचालन गर्दा यात्रुहरूलाई प्रत्यक्ष लाभ पुग्ने महसुस गरी न्यूनतम भाडा दर सात हजार पाँच सय हुने र बुद्ध एयरले डिसेम्बर २०२२ भित्र थप दुईवटा एटीआर ७२ जहाज ल्याउन लागेको विज्ञप्ति जनाएको छ ।

लामो समयदेखिको सपना पूरा भएको र आफुहरुले सस्तो भाडादरमा सुर्खेतबाटै नागरिकहरूले उड्न पाउनुपर्ने विषयमा वकालत गर्दै आएको सुर्खेत उद्योग वाणिज्य संघका महासचिव भद्र भण्डारीले संघको बताए । यसअघि, श्री एयरले एटिआर ७२ विमानको परीक्षण उडान गरे पनि नियमित उडान गरेको छैन ।