महिला क्रिकेटमा बागमती प्रदेशको तेस्रो जित

नेपालभ्युज

काठमाडौं। नवौं राष्ट्रिय खेलकुदको महिला क्रिकेटमा बागमती प्रदेशले तेस्रो जित निकालेको छ। आइतबार भएको खेलमा बागमतीले मधेस प्रदेशलाई ८ विकेटले पराजित गरेको हो।

मधेसले दिएको ५५ रनको लक्ष्य बागमतीले १३ ओभर २ बलमा २ विकेट गुमाएर भेटायो । बागमतीका लागि अनिशा मझाकोटीले नटआउट १६ र अस्मिता खरेलले १३ रन बनाइन् । मधेसका लागि सरस्वती कुमारी र कविता गौतमले १–१ विकेट लिए ।

टस जितेर बागमतीले फिल्डिङ रोजेसँगै मधेस ब्याटिङमा उत्रियो । १८ ओभर २ बलमा प्याक भएको मधेसले ५४ रन जोड्यो । मधेस टोली फितलो ब्याटिङ प्रदर्शन गरेको थियो । मधेसलाई पेभिलियन फर्काउन बिपिशा शाही, सोनी पाख्रिन र खुसी डंगोलले २–२ विकेट लिए।