सीसीटीभी फुटेजबारे प्रहरीले दिएको प्रतिवेदन संसदीय विशेष समितिमा खोलियो, विज्ञसँग थप जानकारी लिने

काठमाडौं । बजेट निर्माणका बेला अनधिकृत मानिसलाई अर्थ मन्त्रालयमा प्रवेश दिईएको आरोपबारे छानबिन गर्न गठित संसदीय समितिले सीसीटीभी फुटेजबारे विज्ञसँग थप सल्लाह गर्ने भएको छ ।

नेपाली प्रहरीको केन्द्रीय प्रहरी विधि विज्ञान प्रयोगशालाका विज्ञबाटै अर्थमन्त्रालयले उपलब्ध गराएको सीसीटीभी फुटेजबारेको प्रतिवेदनबारे जानकारी लिने समितिले निर्णय गरेको छ । यसअघि प्रहरीले सीसीटीभी फुटेजबारेको सिलबन्द प्रतिवेदन दिएको थियो ।

मंगलबार बिहान बसेको बैठकमा प्रहरीले बुझाएको प्रतिवेदन खोलिए पनि त्यसको विश्लेषण भने विज्ञबाटै गर्नुपर्ने निष्कर्ष निकालिएको समितिका सचिव सुरेन्द्र अर्यालले जानकारी दिए । बैठक मंगलबार अपरान्ह ४ बजे फेरी बोलाइएको छ ।  प्रहरीको प्रयोगशालका विज्ञबाट थप जानकारी लिएपछि मात्रै विस्तृत विवरण सार्वजनिक गरिने अर्यालले बताएका छन् ।

समितिले अर्थ मन्त्रालयबाट सीसीटीभी फुटेज मागे पनि जेठ १४ को फुटेज नपाएपछि ‘रिकभर’का लागि प्रहरीको फरेन्सिक ल्याबमा पठाएको थियो । फुटेज रिकभर भए /नभएकोबारे समेत खुलाईएको छैन ।

बजेट निर्माणमा करको दर हेरफेर गर्न अर्थमन्त्रालयमा अनधिकृत व्यक्ति प्रवेश गरेको आरोप लागेपछि छानबिनका लागि संसदीय विशेष समिति गठन गरिएको हो । तर यस विषयमा समितिले अहिलेसम्म कुनै प्रमाण फेला पार्न सकेको छैन ।