बाटो खुल्यो मोटर चल्यो रायडाँडामा

बागलुङ। भीरको बाटो हिँड्नुपर्दा विद्यालय पुग्न पनि सास्ती थियो। प्रशासनिक कामले वडा कार्यालय जानुभन्दा सदरमुकाम पुग्न सहज थियो।

उक्त भीर काटेर अहिले टोलटोलमा सडक पुगेको छ। बागलुङ नगरपालिका–११ को रायडाँडामा अहिले टोलटोलमै गाडी चढेर पुग्न सकिने भएको हो। जोखिम क्षेत्र भएकाले विशेष क्षेत्रमा सूचीकृत गरेर लगानी बढाउँदा रायडाँडाले विकासको गति लिएको हो।

विशेष क्षेत्रलाई लगानीमा प्राथमिकता दिने सरकारी नीति र वडाको निरन्तर प्रयासपछि भीर फोडेर २० किमीभन्दा धेरै सडक सञ्जाल बनेको छ। त्यसमध्ये ११ किमी लामो पूर्व–पश्चिम फैलिएको वडा गौरवको सडक बनेको हो। त्यसबाहेक चारवटा छोटा सडक बनेपछि सबै टोलमा जिप चढेर पुग्न सकिने भएको छ।

सदरमुकामसम्म पुग्ने सडकको ट्रयाकमात्रै खुलेको रायडाँडामा अब भने सबै टोलमा गाडी चढेर जान सकिने भएको हो। बिरामी पर्दा समयमा उपचार गर्न नपाउने बाध्यता अहिले हटेको स्थानीयवासीले बताए। रामतोला, आफ्रे र सल्यानवासी चार घण्टा लगाएर सामान्य काममा वडा पुग्ने बाध्यता अहिले हटेको हो। रायडाँडामा गर्भवती, सुत्केरी र बुढापाकालाई डोकोमा बोकिएर स्वास्थ्यचौकी पुर्‍याउनुपर्ने बाध्यताको अन्त्य भएको छ।

भौगोलिक जटिलताका कारण वडाका ६० प्रतिशत घरका मानिस सदरमुकाममा डेरा लिन्थे। गाडी चढेर दुई–तीन घण्टासम्म पैदलयात्रा गर्नुपर्थ्यो। तर अहिले गाउँ पुग्ने सडक स्तरीय भएको छ। सदरमुकामबाट झण्डै ३० किमी दूरीको आफ्रे र सल्यानसम्म गाडी चढेर पुग्न सकिने भएको हो। मुख्य सडकमात्र नभई वडाका सबै टोलटोलमा बाटो पुगेको छ।

जटिल भूगोल चिरेर गौरवको आयोजनाअन्तर्गत वडाभित्रै ११ किमी लामो छुट्टै सडक बनेको हो। यो सडकले तत्कालीन रायडाँडा गाविसको वडा नं १ देखि ९ सम्मका सबै बस्ती जोड्छ। “यो सडकको ट्रयाक खुलेपछि हामीलाई बलेवा, जैमिनी नगरको कुश्मीसेरा र सदरमुकाम जता गएपछि बाटो खुल्यो”, रामतोलाका धनबहादुर हरिजनले
तेजकुमारी क्षेत्रीले बताए।

सडक सञ्जाल सबै टोलमा पुगेपछि उपचारमा निस्कनेदेखि विद्यार्थी र शिक्षकले पनि सहज यात्रा गर्न पाएको बताए। किसानले फलाएका उत्पादन बजार पठाउन पनि सकेकोमा खुशी भएका छन्।