मकवानपुर प्रहरीले लागूऔषधसहित तीन जनालाई पक्राउ गर्‍यो

नेपालभ्युज

हेटौंडा। मकवानपुर प्रहरीले छुट्टाछुट्टै स्थानबाट अवैध लागूऔषधसहित तीन जनालाई पक्राउ गरेको छ।

हेटौंडा–४ स्थित पासा चटामरी हाउसबाट २० बोतल लागूऔषध ओमरेक्स र गाँजासहित दुई जनालाई पक्रेको छ। पक्राउ पर्नेमा हेटौंडा–२ का ४० वर्षीय नमोरत्न मानन्धर र हेटौंडा–८ का १८ वर्षीय अभिषेक मोक्तान छन्।

जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक जयश्वर रिमालका अनुसार उनीहरूको साथबाट २० बोतल ओमरेक्स र २० ग्राम गाँजासमेत फेला पारेको छ।

यस्तै प्रहरी चौकी लेवटको टोलीले हेटौंडा–३ बसामाडीका ३३ वर्षीय अशोक विश्वकर्मालाई लागूऔषध गाँजासहित पक्रेको छ।

उनले घरमा लुकाइराखेको अवस्थामा २ किलो ८०० ग्राम गाँजा फेला पारेको हो। लागूऔषधसहित पक्राउ परेका तीनै जनालाई आवश्यक अनुसन्धान एवं कारबाही प्रक्रिया बढाइएको जिल्ला प्रहरी कार्यालय मकवानपुरले जनाएको छ।