मधेश प्रदेशमा ११ हजारले लगाए बुस्टर खोप

जनकपुरधाम। कोरोना भाइरसको तेस्रो लहर चलिरहेको बेला मधेश प्रदेशमा हालसम्म लक्षित जनसंख्याको ४४ प्रतिशत नागरिकले खोपको पूर्ण मात्रा र करीब ११ हजार नागरिकले बुस्टर डोज लगाएका छन् ।

कोरोना भाइरसको तेस्रो लहर चलिरहेको समय मधेश प्रदेशमा हालसम्म १२ वर्ष माथिका उमेरका ४४.२ प्रतिशत नागरिकले कोरोनाविरुद्धको खोप लगाएको स्वास्थ्य निर्देशनालय मधेश प्रदेशले जनाएको छ ।

स्वास्थ्य निर्देशनालयको तथ्यांकअनुसार सर्लाहीमा ५५.५ प्रतिशत, बारामा ४९.४ प्रतिशत, धनुषामा ४९.१ प्रतिशत, पर्सामा ४३.८ प्रतिशत, सप्तरीमा ४२.७ प्रतिशत, सिरहामा ४०.७ प्रतिशत, महोत्तरीमा ३५.४ प्रतिशत र रौतहटमा ३४.७ प्रतिशत लक्षित नागरिकले कोरोनाविरुद्धको खोपको पूर्ण डोज लगाएका छन् ।

यस प्रदेशमा पहिलो डोज भने ५१.५ प्रतिशत नागरिकले लगाएका छन् ।

त्यसैगरी नेपाल सरकारले अग्रपंक्तिमा खटिएकाहरूलाई बुस्टर डोज दिन शुरु गरेकोमा मधेश प्रदेशमा करीब ११ हजार जनाले बुस्टर डोज लगाएका छन् ।

स्वास्थ्य निर्देशनालय मधेश प्रदेशका निर्देशक विजय झाले आइतबारसम्ममा मधेश प्रदेशमा १० हजार ९ सय ९८ जनाले बुस्टर डोज लगाएकोे जानकारी दिए।

बारामा सबैभन्दा बढी ३ हजार २ सय २० जनाले बुस्टर डोज लगाएका छन् । त्यस्तै सर्लाहीमा २ हजार २६, धनुषामा १ हजार ९ सय ६०, रौतहटमा १ हजार ८ सय २३, सिरहामा १ हजार ८७, महोत्तरीमा ४ सय १६, सप्तरीमा ३ सय २१ र पर्सामा १ सय जनाले बुस्टर डोज लगाएको स्वास्थ्य निर्देशनालयले जनाएको छ ।

बुस्टर डोज पाउनेहरूमा कर्मचारी, प्रहरी, स्वास्थ्यकर्मी, सफाईकर्मी, पत्रकार, जनप्रतिनिधिहरू, कानून व्यवसायी तथा अग्रपंक्तिमा रहेका अन्य व्यक्तिहरू रहेका छन् ।

बुस्टर डोजको अवधि प्रमुख जिल्ला अधिकारीको अध्यक्षतामा रहने जिल्ला खोप समन्वय समितिको निर्णयअनुसार थप हुने पनि स्वास्थ्य निर्देशक झाले जानकारी दिए ।

यसैगरी माघ १४ गतेबाट ६० वर्ष माथिका व्यक्तिलाई खोप दिने कार्यक्रम रहेको निर्देशनालयले जनाएको छ । बुस्टर डोजसँगै नियमित खोप कार्यक्रम जारी रहेको छ ।

धनुषाका खोप अधिकृत राजदेव यादवले वैदेशिक रोजगारीमा जानेलाई जोनसन एण्ड जोनसनको खोप दिने काम भइरहेको जानकारी दिए । वैदेशिक रोजगारीमा जानेलाई जोन्सनको मान्यता बढी रहेकाले जोन्सन खोप दिने काम भइरहेको छ।