युवायुवतीको प्रेम सम्बन्धका कारण धनुषामा प्रहरी र स्थानीयबीच झडप, अश्रुग्यास प्रहार

नेपालभ्युज

जनकपुरधाम । युवायुवतीको प्रेम सम्बन्धको विषयलाई लिएर धनुषाको औरही गाउँपालिका–१ पौडेसरमा प्रहरी र स्थानीय बासिन्दाबीच झडप भएको छ ।

केटा र केटी समूहबीच विवाद उत्पन्न भएपछि प्रहरीले परिस्थिति नियन्त्रणमा लिन खोज्दा झडप भएको हो ।

केटी समूहले सडक अवरुद्ध गर्दै प्रदर्शन गरेको थियो । प्रहरीले बल प्रयोग गरेर खुलाउने प्रयास गर्दा अवरुद्ध गर्ने पक्ष प्रहरीसँग भिड्न आएको हो ।

स्थिति नियन्त्रणमा लिन दर्जन सेल अश्रुग्यास प्रहार गरेको धनुषाका प्रहरी प्रवक्ता डीएसपी रञ्जन अवाले जानकारी दिए । घटनास्थलको अवस्था अहिले पनि तनावपूर्ण रहेको बताइएको छ ।

केटी भगाएको भन्दै केटा पक्षमाथि मुद्दा चलिरहेको छ । पाँच जनालाई नियन्त्रणमा लिएर अपहरण तथा शरीर बन्धक मुद्दा पनि चलाएको प्रहरीले जनाएको छ । युवतीको खोजतालास जारी रहेको बताइएको छ । युवतीका आफन्तले सडक अवरुद्ध गरेका हुन् ।