नेप्सेमा उच्च अंकको वृद्धि, कारोबार रकम साढे ६ अर्ब

काठमाडौं। धितोपत्र बजारमा शेयर कारोबार मापक नेप्से परिसूचक आज पनि उच्च अंकले वृद्धि भएको छ। नेपाल स्टक एक्सचेञ्जका अनुसार कारोबार मापक नेप्से ५४.१२ अंकले उकालो लागेर दुई हजार ८५७.७५ मा पुगेको छ।

यस्तै, ठूला कम्पनीको कारोबार मापन गर्ने सेन्सेटिभ परिसूचक ८.९४ अंकले वृद्धि भएर ५३०.८३ मा पुगेको छ।

कूल २२४ कम्पनीको एक करोड १८ लाख ३४ हजार २१६ कित्ता शेयर ६ अर्ब ६६ करोड ९७ लाख ४८ हजार ५६८ मूल्यमा खरिद बिक्री भए। आजको कारोबारपछि बजार पूँजीकरण ४० खर्ब ३७ अर्ब १२ करोड ७२ लाख २० हजारको हाराहारीमा पुगेको छ।

कारोबार भएका १३ उपसमूहमध्ये आज अन्य उपसमूहको मात्रै शेयर मूल्यमा गिरावट देखिएको छ। सो उपसमूह ३.४१ अंकले ओरालो लाग्दा बैंकिङ ९.८७, व्यापार ८३.४५, होटल तथा पर्यटन ३५.६९, विकास बैंक १४७.६५, जलविद्युत् १५८.४७, वित्त ९२.५९, निर्जीवन बीमा २८८.५६, उत्पादन १२७.३३, लघुवित्त १७४.३४, जीवन बीमा ३४९.६१, सामूहिक लगानी कोष ०.१५ र लगानी ३.०५ अंकले उकालो लागेको छ।

कारोबारका आधारमा माथिल्लो तामाकोसी शीर्ष स्थानमा छ। सो कम्पनीको ३४ करोड ३१ लाख ४३ हजार २४५ बराबरको कारोबार भयो।

यस्तै, अपिपावर कम्पनी २३ करोड २३ लाख ३० हजार ९७०, नेपाल पूर्वाधार बैंक २२ करोड २९ लाख ११ हजार ७१७, एचआइडिसीएल २१ करोड ९४ लाख ६४ हजार ६६८ र हिमालयन डिस्टिलरी १४ करोड ४९ लाख ९२ हजार ३३४ बराबरको कारोबार भई शीर्ष पाँचभित्र पर्न सफल भए।

नेप्सेका अनुसार मध्य भोटेकोसी जलविद्युत् कम्पनी ९.९८, माउण्टेन हाइड्रो ९.४४, कर्णाली डेभलपमेन्ट बैंक ९.३५, शिवश्री हाइड्रोपावर ९.०१ र आइसिएफसी फाइनान्सका लगानीकर्ताले ८.५४ प्रतिशतले कमाए।

त्यस्तै, नबिल डिबेञ्चर २.०३, एनआईसी एशिया सेलेक्ट फण्ड १.४१, नारायणी डेभलपमेन्ट बैंक १.१९, राष्ट्रिय बीमा कम्पनी तथा स्ट्याण्डर्ड चार्टर्ड बैंकका लगानीकर्ताले ०.९९ प्रतिशतले गुमाए।