काठमाडौं । भारतीयको चर्चित क्रिकेट प्रतियोगिता आईपीएल (IPL) विभिन्न कारणमा विवादमा आइरहन्छ ।
जारी सिजनको आइतबार कोलकाताको इडेन गार्डेनमा भएको खेलमा कोलकाता नाइट राइडर्स र सनराइजर्स हैदरावादबीचको खेलमा भोजपुरी भाषामा कमेन्ट्री गर्दा अश्लील शब्द प्रयोग गरेको भन्दै विवाद उत्पन्न भएको छ ।
धेरै दर्शकले यसको भिडियो सोसल मिडिया साइट एक्समा सेयर गरेका छन् । र, उचित कारबाहीको माग गरेका छन्।
यो भिडियो निकै भाइरल भइरहेको छ ।
यो विवादास्पद टिप्पणी सनराइजर्स हैदरावादको इनिङ्सको १९औं ओभरमा गरिएको हो ।
त्यतिबेला मिचेल स्टार्क बलिङ गरिरहेका थिए भने हैदरावादका ब्याट्सम्यान हेनरिक क्लासेन स्टार्कको बलमा लामो सट प्रहार गरिरहेका थिए । उक्त ओभरमा उनले तीन छक्का प्रहार गरेका थिए ।
मिड विकेटमा क्लासेनले छक्का प्रहार गर्दा भोजपुरी कमेन्टेटरले अश्लील शब्द प्रयोग गरेको आरोप लागेको छ । जुन भिडियो क्लिप सामाजिक सञ्जालमा भाइरल भइरहेको छ ।
धेरै दर्शकहरूले बीसीसीआई सचिव जय शाहसँगै भोजपुरी फिल्म अभिनेता तथा नेता मनोज तिवारी र रवि किशनलाई ट्याग गरेको समस्या समाधान गर्न दबाब दिएका छन् ।
यो विषयलाई गम्भीरताका साथ सोच्न पनि आग्रह गरेका छन् ।
भोजपुरी कमेन्टेटरमा कमेन्ट्री गर्ने क्षमता नभएको उनीहरुको आरोप छ ।
तर, बोर्डले यस विषयमा अहिलेसम्म कुनै प्रतिक्रिया दिएको छैन ।
Facebook Comment
Comment