कर्णालीसँग हारेपछि एपीएफको फाइनल पुग्ने सम्भावना सकियो, आसिफको शतक

काठमाडौं। प्रधानमन्त्री कप राष्ट्रिय क्रिकेटमा आफ्नो अन्तिम खेलमा एपीएफ कर्णाली प्रदेशसँग २१ रनले पराजित भएको छ । यो सँगै एपीएफको फाइनल पुग्ने सम्भावना पनि सकिएको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा बुधबार भएको खेलमा २०७ रनको लक्ष्य पछ्याएको एपीएफ ४४ ओभरमा १८५ रनमा अलआउट भयो।

एपीएफका लागि आसिफ शेखले शतकीय पारी खेले । तर, जित दिलाउन सकेनन् । उनले ११६ बलमा १० चौकार २ छक्का प्रहार गर्दै १०८ रन बनाए। अमर रौतेला २८ रनमा अविजित रहँदा कप्तान रोहित कुमार पौडेलले १४ रन बनाए।

कर्णालीका प्रकाश जैशीले ४ विकेट लिए । दिपेन्द्र रावत र यूनिश सिंहले २–२ तथा दिवान पुन र दिनेश अधिकारीले १–१ विकेट लिए।

पहिले ब्याटिङ गरेको कर्णाली ४४.१ ओभरमा २०६ रनमा अलआउट भएको थियो । कर्णालीका हिमान्शु शाही र अर्जुन घार्तीले अर्धशतकक बनाए । हिमान्शुले ६२ रन र अर्जुनले भने ५३ रनको योगदान गरे।

९ खेलबाट १० अंक जोडेको एपीएफ अंक तालिकाको पाँचौँ स्थानमा रह्यो । फाइनलको दौडबाट यसअघि नै बाहिरिएको कर्णाली भने ८ अंकसहित सातौं स्थानम रह्यो।