रेशम चौधरीको मुद्दा हेर्दाहेर्दैमा, अर्को पेसी मंगलबार

नेपालभ्युज

काठमाडौँ । टिकापुर घटनाका प्रतिवादी रेशमलाल चौधरी लगायतको मुद्दा सोमबार पनि हेर्दाहेर्दैमा राखिएको छ ।

सोमबार सर्वोच्च अदालतका न्यायाधीशद्वय डा.आनन्दमोहन भट्टराई र नहकुल सुवेदीको संयुक्त इजलासमा परेको मुद्दामा बहस नसकिएपछि मंगलबार अर्को पेसी तोकिएको छ ।

यसअघि कैलाली जिल्ला अदालत र उच्च अदालत दिपायलले टिकापुर घटनामा दोषी ठहर गरेका चौधरी हाल डिल्लीबजार कारागारमा कैद सजाय भुक्तान गरिरहेका छन् ।

चौधरीले उच्च अदालत दिपायलको फैसलालाई बदर गरी पाउँ भनि दिएको पुनरावेदनको रिटमाथि सर्वोच्च अदालतमा सोमबार बहसमा समय अभाव भएपछि मंगलबारका पेसी तोकिएको हो ।

२०७७ फागुन १२ गते सर्वोच्च अदालतमा दर्ता भएर पटकपटक हेर्न नभ्याइनेमा परेको उक्त मुद्दा गत वैशाख २५ गतेको पेसीमा चढ्दा जेठ १ गतेका लागि हेर्दाहेर्दैमा राखिएको थियो ।