माओवादी केन्द्रको दम्भले हामी दुःखी छौं : नेपाल

सुर्खेत। नेकपा एकीकृत समाजवादीका अध्यक्ष माधवकुमार नेपालले माओवादी केन्द्रको दम्भका कारण आफूहरू दुःखी भएको बताएका छन् । पार्टीको प्रशिक्षणको सिलासिलामा सुर्खेत आएका नेपालले पत्रकार सम्मेलनमा अध्यक्ष नेपालले माओवादी केन्द्रमा घमण्ड बढ्दै गएको त्यसबाट आफू दुःखी भएको बताएका हुन् ।

बजेटको बाँडफाँड गर्ने, अनि यो पार्टीको कुनै अस्तित्वै छैन भन्ने ठान्ने गरेको र खासगरी माओवादी पार्टीको व्यवहारबाट हाम्रा साथीहरू धेरै दुःखित भएको अध्यक्ष नेपालले बताए । उनले भने, ‘म भन्न चाहन्छु– दम्भ र घमण्डले रावण जन्मायो, दम्भ र घमण्डले अर्काे रावण जन्माउने काम नगर्नुस् । त्यसो हुनाले त्यो घमण्ड छोड्नुस्, समानताको व्यवहार गर्नुस् । मिलेर अगाडि बढ्नुस् ।’

उनले भने, ‘होइन भने एकचोटि एउटाले घमण्ड गर्‍यो, उसले लोप्पा खायो । अर्काेले फेरि घमण्ड गर्‍यो, उसले पनि लोप्पा खायो । अब तेस्रो घमण्ड गर्ने, कसको पालो छ, त्यो मात्रै बाँकी छ । थाहा होला नि– पहिले केपी ओलीले घमण्ड गरे, पछि शेरबहादुरजीले घमण्ड गरे, फेरि केपी ओलीले घमण्ड गरे, अब घमण्ड गर्ने पालो कसको छ, हेर्न बाँकी छ, त्यसैले घमण्ड नगर्नुस् ।’