जसपाले केन्द्रीय सदस्य घटाउने, संघीय परिषद् हटाउने

काठमाडौं। उपेन्द्र यादव नेतृत्वको जनता समाजवादी पार्टीले केन्द्रीय समिति सदस्यको संख्या घटाउने र संघीय परिषद् हटाउने भएको छ।

यही चैत २६, २७ र २८ गतेका लागि बोलाइएको विधान अधिवेशनमा सो प्रस्ताव लैजाने तयारी भएको सो पार्टीले जनाएको छ । विधानको संशोधित मस्यौदामा १५१ सदस्यीय कार्य समितिको प्रस्ताव गरिएको छ ।

हाल जसपाको विधानमा ७०१ सदस्यीय कार्य समिति रहने भनिएको छ । विधान मस्यौदामा सो संख्या घटाएर घटाएर १५१ कायम गर्ने प्रस्ताव गरिएको भए पनि यो पारित हुने सम्भावना भने कम भएको एक नेताले बताए ।

‘पदमा रहेका साथीहरूलाई जिम्मेवारीबाट हटाउँदा वा पद घटाउँदा पार्टीमा समस्या र असन्तुष्टि बढ्न सक्छ’ उनले भने–‘विधान अधिवेशनले सबैलाई मान्यहुने प्रस्ताव नै पारित गर्छ।’

पार्टी अध्यक्ष उपेन्द्र यादवको नेतृत्वमा गठन भएको विधान तयारी समितिले मस्यौदा अध्ययनका लागि मातहतका निकायलाई पठाइसकेको जनाएको छ । मस्यौदामा नेताहरूको उमेरसमेत निश्चित गरिएको छ ।

मस्यौदाअनुसार केन्द्रीय समितिमा ४० प्रतिशत युवा हुनुपर्ने प्रस्ताव गरिएको छ भने ७० वर्ष पूरा भएको व्यक्ति केन्द्रीय समिति, प्रदेश समिति र जिल्ला समितिको पदाधिकारी वा सदस्यमा निर्वाचित हुन वा बस्न नपाउने व्यवस्था गरिएको छ ।

केन्द्रीय समितिको निर्वाचनमा कम्तीमा एक तिहाइ महिलासहित नेपालको विविधता प्रतिविम्बित हुनेगरी पार्टी सदस्य संख्याको अनुपातमा मधेसी, आदिवासी जनजाति, थारू, दलित, महिला, खस आर्य, मुस्लिम र अल्पसंख्यक समुदाय हुनुपर्ने र सामाजिक समूहहरूबाट ७० प्रतिशत र खुल्ला प्रतिस्पर्धाबाट ३० प्रतिशत केन्द्रीय सदस्यहरू निर्वाचित हुने मस्यौदामा उल्लेख छ ।

विधानबाट राष्ट्रिय समिति पनि हटाइने भएको छ । हाल जसपामा मधेस, लिम्बुवान, किराँत, शेर्पालुङ, खसान, तमुवान, ताम्सालिङ, थारुवान, नेवा, मगरात र शिल्पी दलित राष्ट्रिय समिति रहेका छन्।

त्यस्तै, संघीय परिषद्को व्यवस्था पनि हटाउने प्रस्ताव गरिएको छ । हाल संघीय परिषद्को अध्यक्षमा अशोक राई छन् ।