केन्द्रीय सर्भरमा समस्या हुँदा देशभर स्वास्थ्य बिमा कार्यक्रम अवरुद्ध

नेपालभ्युज

काठमाडौं। स्वास्थ्य बिमा कार्यक्रम लागू भएका देशभरका अस्पतालमा आइतबार बिहानैदेखि सेवा अवरुद्ध भएको छ । केन्द्रीय सर्भरमा समस्या आएको भन्दै अस्पतालहरूले समेत सेवा स्थगित गरेको जनाएका छन्।

महाराजगञ्जस्थित त्रिभुवन विश्वविद्यालय शिक्षण अस्पतालले सूचना टाँस गरी अस्पतालबाट दिइने सेवा स्थगित रहेको जानकारी गराएको छ । स्वास्थ्य बिमा बोर्डले पनि बिहानैबाट सर्भरमा समस्या आएको जनाएको छ ।

यो समस्याको निराकरणका लागि प्राविधिकहरू काममा खटिइसकेको र केही समयमा सेवा सुचारु हुनसक्ने भनिएको छ। स्वास्थ्य बिमाको काम शनिबार बन्द हुने भएकाले हिजोका सेवाग्राहीको समेत आज भीड लागेको छ ।

तर, सबै अस्पतालहरूले सर्भरमा समस्या आएको भन्दै बिमित बिरामीलाई फर्काइरहेका छन् । जसले गर्दा सर्वसाधारण तथा बिरामी मर्कामा परेका छन् ।