जनकपुरलाई हराउँदै लुम्बिनी अलस्टार्स नेपाल टी–२० लिगको फाइनलमा

काठमाडौं। लुम्बिनी अलस्टार्स नेपाल टी–२० लिगका फाइनलमा पुगेको छ।

त्रिवि अन्तर्राष्ट्रिय क्रिकेट मैदानमा आइतबार भएको क्वालिफायरमा लुम्बिनी अलस्टार्सले जनकपुर रोयल्सलाई ६ रनले पराजित गरेको हो।

पराजित भएको जनकपुरले अर्को एउटा मौका पाउनेछ । उसले एलिमिनेटरको विजेतासँग फाइनल पुग्नको लागि प्रतिस्पर्धा गर्नेछ ।

१४४ रनको लक्ष्य पछ्याएको जनकपुरले पूरै ओभर खेलेर ७ विकेट क्षतिमा १३७ रन मात्रै बनायो। जनकपुरका समिउल्लाह शिनवारी ले ४५ र राजेश पुलामीले ३० रन जोडे। लुम्बिनीका दीपेन्द्र सिंह ऐरी, विपुल शर्मा र सागर ढकालले २–२ विकेट लिए ।

पहिले ब्याटिङ गरेको लुम्बिनीले पुरै ओभर खेलेर ८ विकेट गुमाउँदै १४३ रन बनाएको थियो । इशान पाण्डेले ३८ र अनिल साहले २४ रन बनाए । जनकपुरका अशान प्रियान्जन र सामपाल कामीले २–२ विकेट लिए ।

सोमबार एलिमिनेटरमा विराटनगर सुपरकिङ्स र काठमाडौं नाइट्स भिड्नेछन्।