रविलाई पार्टी सभापतिबाट हटाउन माग गर्दै निर्वाचन आयोगमा उजुरी

काठमाडौं। नागरिकता विवादमा गृहले छानबिन गरिरहेका राष्ट्रिय स्वतन्त्र पार्टीका सभापति रवि लामिछानेको साधारण सदस्यता खारेजको माग गर्दै निर्वाचन आयोगमा उजुरी परेको छ।

वैद्य नेपाली नागरिकता नभएका व्यक्तिले राजनैतिक दल खोल्न वा सदस्य हुन नपाउने भन्दै हटाउन माग गर्दै उजुरी परेको हो।

खारेज भएको नागरिकता प्रयोग गर्ने व्यक्ति दलको अध्यक्ष वा सभापति हुन नमिल्ने दाबीसहित सोमबार युवराज पौडेलले निर्वाचन आयोगमा उजुरी दिएका हुन्। उजुरीमा वैध नागरिकता नै नभएका लामिछानेको सभापतित्वमा दल दर्ता गरेर निर्वाचन आयोगले त्रुटि गरेको दाबी गर्दै लामिछानेलाई सभापतिसँगै दलको साधारण सदस्यता समेत खारेज गर्न माग गरिएको छ।

रवि लामिछानेको ‘सांसद’ पदमा खतराको घण्टी, आरोप पुष्टि भए पद खारेज हुने

‘नेपाली नागरिकता नै नभएका लामिछानेलाई उक्त दलको सभापतिको मान्यता दिन एवं सो दलको साधारण सदस्यता समेतको मान्यता दिन नमिल्ने भएको हुँदा निजको सभापतित्व र साधारण सदस्यता निर्वाचन आयोगले खारेज गर्न वा सो गर्न गराउन राष्ट्रिय स्वतन्त्र पार्टीलाई निर्देशन दिन’ निवेदनमा माग गरिएको छ।

निवेदनमा गरिएको दाबी अनुसार लामिछानेसँग वैध नागरिकता नभए उनी पार्टीको साधारण सदस्य समेत रहन सक्दैनन्। उनले अमेरिकी नागरिकता लिँदा निष्क्रिय भएको नेपाली नागरिकता सक्रिय बनाउन कानुनी प्रक्रियामै नगएको स्विकारिसकेका छन्।

पौडेलले यस अगाडि गृह मन्त्रालयमा दिएको नागरिकता सम्बन्धी उजुरीमा आधारमा जिल्ला प्रहरी परिसरले छानबिन गरिरहेको छ। आइतबार अख्तियार दुरुपयोग अनुसन्धान आयोगले गृह र परराष्ट्र मन्त्रालयमा पत्र पठाएर छानबिन गर्न निर्देशन दिएको थियो।