बगदादस्थित अमेरिकी दूतावास परिसरमा रकेट आक्रमण

एजेन्सी। बगदादमा रहेको अमेरिकी दूतावासमाथि रकेट आक्रमण भएको छ। दूतावासमा बिहीबार संदिग्ध आतंकवादी समूहहरूबाट रकेट आक्रमण भएको बताइएको छ।

दूतावासमा भएको रकेट आक्रमणमा एक महिला र एक युवती घाइते भएका छन्।

दूतावासले ट्विटरमा भनेको छ, ‘आज साँझ अमेरिकी दूतावास परिसरमा इराकको सुरक्षा, सार्वभौमसत्ता र अन्तरराष्ट्रिय सम्बन्धलाई कमजोर पार्ने प्रयास गर्ने आतंकवादी समूहले आक्रमण गरेको थियो,’ स्पुतनिक न्यूजले रिपोर्ट गरेको छ।

इराक सुरक्षा बलका अनुसार रकेटहरू बगदादको दक्षिणी क्षेत्रबाट प्रहार गरिएको र तथाकथित ग्रीन जोनलाई निशाना बनाइएको थियो, जुन कूटनीतिक नियोगका प्रशासनिक भवनहरू र अमेरिकी दूतावाससहित अन्य दूतावासहरू रहेको क्षेत्र हो।

अमेरिकी दूतावासलाई नियमित रूपमा इराक र सिरियामा आक्रमणको श्रृंखलामा मिसाइलहरूद्वारा निशाना बनाइएको छ जसमा इराकको ऐन अल–असद एयरबेस र सिरियाको ग्रीन भिलेज बेस नजिकै अप्रत्यक्ष रकेट आक्रमणहरू हुने गरेका छन्।

इरानको इस्लामिक रिभोलुसनरी गार्ड कोर्प्सको कुलीन कुड्स फोर्सका कमाण्डर कासिम सुलेमानीको हत्याको दोस्रो वर्षगाँठ अघि र पछि हाल आक्रमणहरू तीव्र भएका छन्।