काठमाडौं । टी–२० सिरिज खेल्न वेस्ट इन्डिज ‘ए’ टोली नेपाल आइपुग्दा नेपाल क्रिकेट संघ (क्यान)ले गरेको स्वागत शैलीको विरोध भएको छ ।
१५ वैशाखबाट सुरु हुने खेल खेल्न आएका विदेशी खेलाडीको स्वागतका क्रममा बोलेरो जीप लगिएको भन्दै आलोचना भएको हो ।
नेपालसँगको ५ खेलको टी–२० सिरिज खेल्न वेस्ट इन्डिज ‘ए’ टोली बुधबार बिहान नेपाल आइपुग्दा लिनको लागि बोलेरो जीपमा लगिएको भन्दै सामाजिक सञ्जालमा आलोचना भएको छ ।
खेलाडीका क्रिकेट किट तथा लगेजको व्यवस्थापन बोलेरो जीपमा गरिएको थियो । यसको भिडिओ तथा तस्वीर सामाजिक सञ्जालमा भाइरल छ । यसैलाई लिएर क्यानको व्यवस्थापन पक्षमाथि प्रश्न समेत उठाइएको छ ।
सामाजिक सञ्जालमा क्यानको तीव्र आलोचना भइरहेको छ । संजाल प्रयोगकर्ताले खेलकुदमन्त्री विराजभक्त श्रेष्ठमाथि पनि प्रश्न उठाइरहेका छन् ।
वेष्ट इण्डिज ‘ए’ र नेपालबीचको पहिलो खेल टीयु क्रिकेट मैदानमा वैशाख १५ गते हुनेछ । वैशाख १६ मा दोस्रो, १९ गते तेस्रो, २० गते चौथो र २२ गते अन्तिम खेल हुनेछ ।
नेपालसँग खेल्न पहिलो पटक वेस्ट इन्डिज टोली नेपाल आएको हो । वेष्ट इण्डिज ‘ए’ नेपाल आउने सबभन्दा उच्च स्तरको टोली हो । यसअघि एसोसिएट राष्ट्रका प्रमुख दुई टोली नेदरल्यान्ड्स र स्कटल्यान्ड नेपाल आइसकेका छन् ।
Facebook Comment
Comment