धारामा पद्मा नुहाउँदै गर्दा देवलाल आएर जिस्काए, प्रतिवाद गरेपछि हँसियाले हानेर ज्यान लिए

पाल्पा। पाल्पामा रिब्दीकोट १ ख्याहा बस्ने १९ वर्षीया पद्मा सुनार  मंगलबार बिहान ९ बजे धारामा नुहाउन र लुगा धुन गइन् । घरबाट १५ मिनेट पर लप्सीखोला हिँडेकी थिइन् । लप्सीखोला दुई किलोमिटर टाढा थियो ।

तर दिउँसो ३ बजेसम्म फर्किइनन् । घरपरिवार उनको खोजीमा निस्किए । खोज्दै जाँदा पद्माको कपडा र सामान कराम्दी जाने गोरेटोमा भेटियो । सामान छरिएको फालिएको अवस्थामा थियो । त्यसपछि कुनै घटना भएको हुनसक्ने आशंका भयो ।

साँझ ५ बजे प्रहरी आएर खोजी गरे । अनुसन्धानका लागि गौतम बुद्ध अन्तर्राष्ट्रिय विमानस्थल सुरक्षा गार्ड, केनाइन शाखा भैरहवाबाट तालिम प्राप्त कुकुर झिकाइयो ।

खोजीको क्रममा पद्मा त्यहाँबाट अन्दाजी २० मिटर तल खरबारीमा रगताम्य अवस्थामा फेला परिन् । तर सास गइसकेको अवस्थामा ।

उनको टाउको, घाँटी, हातमा धारिलो हतियारबाट प्रहार गरिएका चोटहरू थिए । त्यही दिन प्रहरीले मुचुल्का, प्रमाण संकलन गरी शव परीक्षणका लागि लुम्बिनी प्रादेशिक अस्पताल बुटवल पठायो ।

प्रहरीले अनुसन्धानका लागि त्यस दिन ३ -४ जना व्यक्तिलाई नियन्त्रणमा लिएर अनुसन्धान थाल्यो । जिल्ला प्रहरी कार्यालय पाल्पाले अनुसन्धान गर्दा उनको मोबाइलको लोकेशन गाउँ जनिकै एक घरमा देखियो । त्यो घरमा प्रहरीले मोबाइलसहित रगतलागेको कपडा, हँसिया समेत बरामद गर्‍यो । त्यसपछि थाहा भयो, पद्माको हत्यारा ।

उनी रिब्दीकोट १ लप्सीखोला कै १९ वर्षीय सागर भन्ने देवलाल सार्की रहेको र पक्राउ गरिएको पाल्पाको डीएसपी सुगन्ध श्रेष्ठले जानकारी दिए । ‘‘प्रारम्भिक अनुसन्धानमा धारिलो हतियार प्रयोग भई हत्या भएको हुनसक्ने देखिएको थियो । सोधपुछ र प्रमाण संकलन गरी सागरमाथि म्याद थप गर्न लागेका हौँ,’’ उनले भने ।

सागरले यसरी गरेका थिए पद्माको हत्या

पक्राउ परेका सागरले दिएको बयान अनुसार मंगलबार दिउँसो १२ बजे उनी गोठमा काम गरी हसिँया लिएर फर्किरहेका थिए । यता पद्मा (padma sunar) धारामा लुगा धोएर डोकोमा हाल्दै गरेकी थिइन् । त्यसबेला उनीहरू दुई जनाको भेट भयो ।

सागरले पद्मालाई जिस्काए । पद्माले गाली गरिन् । दुवै जनाबीच भनाभन भयो । डिएसपी श्रेष्ठका अनुसार सागर रिसाहा स्वभावका छन् । उनीहरूबीच विवाद चर्किएपछि सागरले पद्मालाई हसिंयाले हाने ।

सागरले आवेगमा आएर पद्मामाथि हँसियाले प्रहार गरेको बयान दिएको स्विकारेको प्रहरीले जनाएको छ । हँसिया प्रहारपछि उनले पद्मालाई २० मिटर तल घिसारेर खरबारीमा पुर्‍याएका थिए । त्यहाँ पनि उनको टाउकोमा दुई\तीन पटक प्रहार गरेको बताएका छन् ।

पँधेरोमा नुहाउन गएकी १९ वर्षिया युवतीको विभत्स हत्या