कम्पनी रजिस्ट्रारमा बुझाएको कागजातका कारण रवि अर्को समस्यामा, कानुनविद्सँग गरे परामर्श

काठमाडौं । ग्यालेक्सी टेलिभिजन सञ्चालन गर्ने गोर्खा मिडिया नेटवर्कका तत्कालीन प्रबन्ध निर्देशक रवि लामिछानेले शेयर छोड्दा कम्पनी रजिस्ट्रारको कार्यालयमा बुझाएको कागजात विवादमा परेपछि कानुनी परामर्श थालेका छन् ।

१ करोड ८० लाख खातामा लिएको बैंक भौचर भरे पनि आफ्नो खातामा रकम जम्मा नभएको बताएका उनले अर्को तमसुक सार्वजनिक भएपछि वरिष्ठ अधिवक्तासँग परामर्श थालेका हुन् ।

रविले गोर्खा मिडिया छोड्दा १५ प्रतिशत सेयरको रकम १ करोड ८० लाख लिएको देखिएको छ । तर, पैसा लिएको भनेर सरकारी अड्डामा ल्याप्चेसहित कागज गरिदिएका रविले पत्रकार सम्मेलनमा भने रकम आफ्नो खातामा नआएको बताएका थिए ।

१ करोड ८० लाखबारे रवि लामिछाने : जम्मा गर्नेसँग पैसा नभएपछि मेरो खातामा जम्मा भएन

बैंक भौचर तथा ल्याप्चेसहितको कागज बनाएर कम्पनी रजिस्ट्रारको कार्यालयलाई छलेर सेयर कारोबार गरिएको भए अन्यसहित किर्तेको कानुन पनि आकर्षित हुन्छ । यसबारे पर्न सक्ने झमेलालाई लिएर उनी तनावमा छन् ।

रविले १५ प्रतिशत सेयर बेच्दा गितेन्द्रबाबु (जीबी) राईसँग १ करोड ८० लाख रुपैयाँ लिएको हस्ताक्षर र ल्याप्चेसहितको कागज कम्पनी रजिस्ट्रारको कार्यालयमा बुझाएका छन् । गोर्खा मिडियामा स्वेट सेयर (पसिनाको हिस्सा) लिँदा १ करोड ८० लाख रुपैयाँ लिएको भन्दै बैंक भौचर कम्पनी रजिस्ट्रारको कार्यालयमा बुझाएका छन् । तर, त्यो पैसा खातामा नआएको र प्रक्रिया पुरा गर्न मात्र फेक भौचर बुझाइएको दाबी गरेपछि कानुनी अड्चन देखिएको हो ।

किनकि कम्पनी ऐन २०६३ अनुसार कुनै कम्पनीको कुनै सञ्चालक वा पदाधिकारीले कम्पनीको कुनै कागजपत्रमा बदनियत वा द्वेषपूर्ण लापरबाहीसाथ कुनै झुट्टा विवरण बुझाउनु हुँदैन । यदि त्यसो गरेको भए पचास हजार रुपैयाँसम्म जरिवाना वा दुई वर्षसम्म कैद वा दुवै सजाय हुने व्यवस्था छ ।

अघिल्लोपटक सम्हालिन नसकेका रवि यसपटक रक्षात्मक

यसअघि रविले आफूले गुडबिल बापतको शेयर हिस्सा पाएको बताएका थिए । टेलिभिजनबाट बिदा हुने दिन उनले आफ्नै कार्यक्रमबाट दर्शकलाई भनेका थिए, ‘यस टेलिभिजनसँग सहकार्य गर्दा मैले आफ्नो पसिनालाई नै आफ्नो थोरै सेयरका रूपमा लिएको हुँ । आज दिउँसो यो सेयर जस्ताको त्यस्तै यो कम्पनीलाई ससम्मान बुझाएर निस्कँदै छु ।’

उनले ‘स्वेट सेयर’ लिएको विषय सामाजिक सञ्जाल, सार्वजनिक कार्यक्रम र सञ्चारमाध्यमसँग प्रतिक्रिया दिने क्रममा पनि दोहोर्‍याउँदै आएका छन् ।

सहकारीमा बचतकर्ताले जम्मा गरेको पैसा गोर्खा मिडियामा लगानी थियो । त्यही रकम रविले लिएको भन्दै एउटा मिडियाले निरन्तर समाचार प्रकाशित गरिरहेको छ ।

रविले गरे आत्मालोचना, मिडियामाथि गरेको टिप्पणीप्रति मागे माफी

तर, कम्पनी रजिस्ट्रार कार्यालयमा गोर्खा मिडियाको फाइलमा आफूले बुझाएको फाइल भुठो विवरण भएको उनी आफैँले बताएका छन् । त्यसपछि उनी फेरि कानुनी झोमेलामा परेका हुन् ।

कानुनी झमेलाबाट पार पाउन उनी वरिष्ठ अधिवक्तासँग परामर्शमा रहेको उनी निकट स्रोतले बताएको छ ।

पैसा लिएको छु भनौँ भने सहकारीमा बचतकर्ताको रकम लिएको देखिन्छ । बचतकर्ताको पैसा दुरुपयोगमा रवि प्रत्यक्ष संलग्न भएको ठहर्छ । त्यसैले आफूले पैसा नलिएको उनले दाबी गरेका छन् । तर, लिएको छैन भनेर दाबी गर्दा कम्पनी रजिस्टार कार्यालयमा विवरण बुझाइएको छ । त्यो झुटो ठहर्छ । अहिले रवि यस्तो समस्यामा परेका छन् ।

यही झमेलाबाट पार पाउन उनी मंगलबार दिनभर कानुनी परामर्शमा रहेको निकतवर्तीले बताएका छन् ।

एक करोड ८० लाख लिएको प्रमाण सार्वजनिक भएपछि रवि पुगे ग्लोबल बैंकको कार्यालय